EUA Apoia tan Miliaun 1.35 ba Prevene no Responde COVID-19

DILI, www.news-viptv.com – Estadus Unidos Amerikanu (EUA) oferese tan osan miliaun 1.35 ba programa saude Governu nian hodi prevene no responde COVID-19.

Apoia osan ne’e EUA entrega ba United Nations Children Fund (UNICEF) Timor-Leste nian ba programa ho naran Kontrola Infesaun no Prevensaun.

Osan refere nu’udar fundu addisional ba etapa dahat ne’ebe entrega hosi Diretora Misaun USAID Ann Marie Yastishock ba Reprezentante UNICEF, Bilal Aurang Zeb Durrani no assiste hosi Vise-Ministru Saude Jose Magno.

Vise Ministru Saude, Jose dos Reis Magno hateten maski pandemia COVID-19 remata tiha ona, UNICEF no USAID kontinua servisu hamutuk ho Ministerio Saude hodi kontinua kombate COVID-19 ba etapa dahat nian.

“UNICEF no USAID servisu makas hodi apoiu nafatin Timor-Leste, tamba ne’e mai ho objetivu ne’e kontinuasaun prepara antisipa ba pandemia COVID-19 ba da-4 nian iha oportunidade ne’e mos hodi lansa projetu apoiu orsamento husi USAID ba UNICEF ho montante miliaun 1.35 hodi responde ba COVID-19 no haforsa sistema saude iha Timor Leste,” informa Jose dos Reis Magno ba jornalista sira iha Palacio das Cinzas Caicoli Dili, Kinta (9/11/2023).

Nia esklarese, maske Pandemia COVID-19 ne’e publiku hatene laiha ona, UNICEF ho USAID sei kopera hamutuk ho Ministerio Ssaude hodi asegura nafatin karik pandemia ne’e akontese fila fali, Timor-Leste iha ona kondisoens iha prevensaun no kontrola.

Nia esplika, ba etapa dahuluk iha 2020 hetan apoiu ho montante rihun $ 50, no etapa daruak tinan 2021-2022 ho montante miliaun $ 1.5, etapa datoluk hosi tinan 2022-2023 ho montante rihun $ 900.

Apoiu ba faze da-haat ida-ne’e sei foka liu ba apoiu ba tranzisaun sistema saúde nian husi resposta emerjénsia ba integrasaun sustentavel vasinasaun COVID-19 nian iha programa imunizasaun rutina, estabelesimentu armazenamentu ba sasán sira ne’ebé ho pedidu aas no fornesimentu esensiál sira seluk ne’ebé presiza atu hamate transmisaun COVID-19 nune’e mós hadi’a instalasaun Bee, Saneamentu no ijiene (BESI) iha Sentru Saude Komunitaria sira iha munisípiu adisionál tolu hanesan Bobonaro, Liquisa, no Manufahi.