Ema 23 Grave ho COVID-19, 3 Uza Ventilador no 3 Uza CPAP

DILI, news-viptv.com – Sentru Integradu Jestaun Krizi (SIJK) liu hosi Sala Situasaun relata katak dadus 28 Agostu 2021 iha ema nain 23 grave ho COVID-19.

Kordenadór Forsa-Tarefa ba Prevensaun no Mitigasaun Surtu COVID-19 iha Timor-Leste, Dr. Rui Maria de Araùjo esplika, hosi nain 23 ne’e, nain 3 ho kondisaun uza ventilador no nain 3 tan uza CPAP-Continuous Positive Airway Pressure, no 17 uza oksijéniu.

“Izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu hamutuk 118. Moderadu 60, Leve 35,” informa Dr. Rui Araújo iha komunikadu imprensa ne’ebe publika iha 28 Agostu 2021.

Timor-Leste kontinua aumenta numeru pozitivu foun ho total 276. Hosi numeru ne’e Díli iha nain 197, Baucau 30, Covalima 10, no Munisipiu Seluk 39. Ho aumenta ne’e total kazu ativu iha 4.523 no totál 16.236 komulativu kazu konfirmadu desde tinan 2020  

SIJK mos relata numeru Rekuperadu foun hamutuk ema nian 125. No obitu nain 1 hodi to’o ohin loron ema nain 59 maka governu relata ona mate ho COVID-19.

“Feto, idade tinan 76, Timoroan, hela iha Dili, seidauk vasina, iha 28 Agostu 2021 diagnóstikadu iha emerjénsia HNGV ho sindroma insufisiénsia respiratória aguda (SIRA). Matebian is-kotu iha madrugada 03h03, tanba respiratoric failure/parajen respiratória. Rezultadu PCR hafoin is-kotu CT:22,8. Família rejeita atu hala’o funeral tuir protokolu ne’ebé adopta iha Timor-Leste,” dehan Dr. Rui.