Ema 2 iha Lospalos Mate ho COVID-19, Inklui Bebe ida iha Dili

DILI, news-viptv.com – Ema nain 2 ho idade tinan 42 (mane) no tinan 16 (mane) iha Lospalos, Munisipiu mate ho COVID-19.

Liu hosi komunikadu imprensa loron 4 Setembru 2021, Koordenador Forsa-Tarefa ba Prevensaun no Mitigasaun Surtu COVID-19 iha Timor-Leste, Dr. Rui Maria de Araujo esplika, alende nain rua ne’ebe mate iha Lospalos, iha mos bebe feto ida ne’ebe mate ho COVID-19.

“Bebé feto, idade loron 12, Timoroan, inan hela iha Remexio, seidauk vasina, iha 23 agostu 2021, moris husi inan diagnóstikadu ho Covid-19. Matebian sofre mós sífilis congenital. Hafoin moris hetan pneumonia tamba Covid-19, hala’o tratamentu iha semana ida ikus, maibe iis-kotu ohin12h20,” informa Dr. Rui Araújo.

Entertantu, nain rua ne’ebe mate iha Lospalos ne’e, sedauk simu hotu vasina.

“Mane, idade tinan 42, Timoroan, hela iha Lospalos, seidauk vasina, iha 3 Setembru de 2021 diagnóstikadu iha Lospalos ho sindroma insufisiénsia respiratória aguda (SIRA) tan bá Covid-19. Matebian i’is-kotu ohin dader 05h35, iha Lospalos,” dehan Dr. Rui Araújo.

Nia hatutan, “Mane, idade tinan 16, Timoroan, hela iha Lospalos, seidauk vasina, iha 3 de Setembru de 2021 diagnóstikadu iha Lospalos ho sindroma insufisiénsia respiratória aguda (SIRA) tan bá Covid-19. Matebian sofre mós moras fuan ho anemia. Matebian i’is-kotu horiseik 18h00, iha Lospalos.”

Alende nain 3 ne’ebe mate ne’e, SIJK mos relata Mane, idade tinan 76, hela iha Dili, seidauk vasina mate mos ho COVID-19. Iha 23 Agostu 2021 diagnóstikadu iha HNGV ho sindroma insufisiénsia respiratória aguda (SIRA) tanba Covid-19. Iha loron ne’e kedas matebian hala’o tratamento iha Vera Cruz. Matebian is-kotu ohin 14h55, iha Vera Cruz.

Familia matebian hotu kordena ona ho ekipa saúde atu hala’o funeral tuir protokolu ne’ebé adopta iha Timor-Leste.

Ho numeru mate nain 4 ne’ebe relata iha loron ohin, Totál Óbitu iha Timor-Leste hamutuk 78.

Ba kazu foun ohin loron relata iha ema nain 89 maka pozitivu. Hosi Dili nain 39, Covalima 22,

Lautem 11, Baucau 8 no Munisípiu Seluk 9. Ho kazu ne’e, kazu aivu atual dadauk ne’e ne’e iha 4.261. Totál komulativu kazu konfirmadu 17.468.

“Husi totál kazu detetadu foun ohin, kazu 48 (54%) maka sintomátiku (hatudu sintomas) husi kazu detetadu foun ohin, 20 (22%) simu ona vasina kompletu 7 (8%) simu ona vasina doze dahuluk,” esplika Dr. Rui Araújo.

Alende relata obitu no kazu foun, SIJK mos relata numeru rekuperadu nain 253.

Dadauk ne’e iha nain 95 maka halo tratamentu Izolamentu Vera Cruz, Lahane, HNGV no fatin seluk iha territóriu laran tomak.hosi numeru ne’e nain 15 maka relata kondisaun grave.