Dezemvolve Talentu Juventude, MJDAK Sei Investe iha Desportu no Kultura

Dili, www.news-viptv.com – Ministru Juventude, Desportu, Arte no Kultura (MJDAK), Nelyo Isaac Sarmento hateten IX Governu Konstitusional iha nia politika nasional juventude sei investe makas liu tan iha area desportu no kultura hodi dezemvolve talenta joventude sira.

Ministru Nelyo Isaac hateten lia hirak ne’e iha nia deskrsu wainhira loke torneiu Basketbol ne’ebe organiza hosi Federasaun Nasional Basketbol Timor-Leste (FNBTL) iha Kampu Basketbol MJDAK, Lecidere, Dili, Sexta (17/8/2023).

“Ministériu ida ne’e (MJDAK) sei investe iha Polítika Nasionál Juventude sei garante asaun kordenada ne’ebé subliña metin iha Programa Da-Sia Governu nian katak sei responsável iha area rua Desportu no Kultura, tanba area rua ne’e mak sai instrument importante atu dezenvolve kompetensia sívika, sosiál no lideransa no promove joven sira iha okupasaun hodi kontribui ba pás no sosiál,” dehan Ministru Nelyo Isaac.

MJDAK, esplika Nelyo Isaac, iha papél importante hodi asegura partisipasaun, dezenvolvimentu no autonomia joven sira-nian iha desportu, arte no kultura. Joven sira mak sai hanesan fini lideres nian iha futuru no riku-soin nasaun ida ne’e nian.

“Iha MJDAK, ami-nia dedikasaun nafatin atu promove desportu iha ita-nia foinsa’e sira nia le’et. Ami hatene katak liuhusi desportu, ita bele haburas forsa fíziku no ajuda harii sentidu kona-ba an rasik, hodi kontribui ba ita-nia jerasaun foinsa’e sira-nia bein-estár no kreximentu,” nia dehan.

Membru Governu ne’e apresia ba tulun UN Women ne’ebe bele realiza torneiu basketbol ne’e ho FNBTL no promove mos feto iha torneiu ne’e.

“Ita esperiensia bebeik iha uma no komunidade iha ne’ebé feto barak la hetan opórtunidade atu involve iha atividades desportu. Ita presiza forsa hamutuk atu hakotu bareira ba partisipasaun iguál iha desportu. Ami fiar katak ho kolaborasaun entre UN Women, FNBTL no MJDAC bele fo espasu ba kolaborasaun seluk iha future hamutuk ho federasaun sira seluk atu bele hasa’e partisipasaun feto no juventude nian ba dezenvolvimentu umanu ida ne’ebé síviku, respeita malu no konfiansa forte no liliu atu bele hola parte nu’udar ajente importante iha sosiedade ba violénsia kontra feto no labarik no prevene attitude sira hamonu entegridade juventude asuwain,” nia dehan.

Iha fatin hanesan, Prezidenti FNBTL, Joaquim Martins Gusmão hateten, torneu basketbal nian ne’e tenke iha koperasaun ho UN Women atu integra violensia bazeia ba jeneru ho model desportivo ida.

“Tamba ne’e hetan apoiu ida husi parseiro UN Women no KOICA hodi bele organiza torneu ida ne’e. Tanba ne’e eleva tan Ita nia esforsu hotu hodi tuir aktividade sira mak bele hamenus gender violence ne’e, Ita hatene katak akontese iha ita nia rain gender base violence sempre akontese, hodi nune’e Ita hakarak atu promove no bele evita akontesementu sira ne’e Liu husi desporto,” hateten Joaquim.

Prezidente Confederasaun Desportiva Timor Leste (CDTL), Macario Sanches kongratula ba FNBTL no parseiru sira ne’ebe apoia ona torneiu basketbol ne’e bele realiza hodi bele atrai tan involvementu jovem iha modalidade desportu ne’e.

“Ho torneiu ne’e federasaun bele hahu ekspanda sira nia ejistensia, laos deit hein governu,” dehan Macario Sanches.

Torneiu Basketbol ne’e partisipa hosi ekipa mane 10 no feto 8 ne’ebe uza Sistema meiu kompetisaun.