Deputadu CNRT-FRETILIN Preokupa Kondisaun Estrada Rural

DILI, www.news-viptv.com – Deputadu sira husi bankada CNRT ho FRETILIN preokupa tebes ho kondisaun Estrada sira iha area rural.

Preokupasaun ne’e deputadu sira levanta iha plenaria Parlamentu Nasional, Segunda (17/2/2025).

Natalino dos Santos nu’udar deputadu CNRT husu ba governu atu tau atensaun ba Estrada iha Suku Busukai, Munisipiu Covalima ne’ebe area ne’eba iha tempu resistensia nu’udar fatin istoriku ba gerilleiru sira. Nune’e mos iha suku Mape ne’ebe susar teb-tebes atu populasaun sira lori sira nia produtu local hodi fan iha postu administrative sira.

“Aileu, Estrada Lequidoe, Postu Adminitrativu Remexio iha suku 4, maumeta, fahisoe, fadabloko, suku sira ne’ebe fatin importante produtu barak agrikultor, sabraka, ainanas, iha tempu populasaun atu mai lori Dili, estrada la diak, governu persiza tau atensaun ba Estrada ne’eba,” levanta Natalino dos Santos.

Laos deit ba area rural, Deputadu FRETILIN, Florentino Ximenes “Sinarai” husu ba Ministeriu Transporte no Komunikasaun atu tau traffic light iha parte rotunda Elemloi ne’ebe sempre mosu engrafamentu (macet).

“Perempatan Elemloi, sempre macet, loron, meudia, lokoraik, kalan, ministru la tau atensaun, tau matan, tau lampu merah ba,” dehan Sinarai.

Kestaun traffic light mos hato’o husi Deputadu Jose Virgilio Rodrigues Ferreira husi CNRT ne’ebe husu ministerium relevante atu tau sinais obras ba traffic light iha area Timor Plaza oin ne’ebe labari sira sempre faan manutolu.

“Husu mos zebra cross sira iha dili laran, persiza pinta foun, hodi ema bele uza hakat ba estrada sorin,” dehan Deputadu Jose.

Assuntu Estrada mos levanta husi Deputada Maria Rosa da Camara Bisoi ne’ebe husu ministerium kompetente atu regula motorista sira ne’ebe konduz motor no kareta atu sukat velosidade hodi evita dezastre.

Deputada CNRT ne’e mos husu ba animal nain sira liliu iha area hera no metinaro atu tau matan ba sira nia animal hodi labele husik iha Estrada aspal tamba bele hamosu dezastre.

“Hare mos Animal, karau ho bibi iha aspal, nain iha lae… liliu karau sira ne’ebe sempre halo dezastre. Animal nia fatin tenki halo, aspal ba ema, laos iha animal,” nia dehan.