CNE Husu Tan Miliaun US$ 2.3 ba Rekrutamentu Ofisial ba Sentru Votasaun

DILI, www.news-viptv.com – Komisaun Nasional ba Eleisaun (CNE, sigla Portugues) husu tan ba Parlamentu Nasional atu aumenta orsamentu sira nian ho montante  miliaun US$ 2.3.

Ba jornalista sira, Prezidente CNE, Jose Belo esplika ho orsamentu ne´ebe CNE hetan deit dolares miliaun 10, la sufsiente ba sira nia instituisaun, tamba ne´e maka husu ba Parlamentu Nasional atu aumenta tan bazeia ba nesesidade ne´ebe CNE persiza ba realizasaun eleisaun jeral tinan oin.

“Ami hato´o hela 2.3 oinsa bele rekrutamentu ba ita nia ofisial sira iha sentru votasaun ho estasaun de votu sira atu nune´e para garantia eleisaun ne´ebe diak,” dehan Jose Belo, Segunda (10/10/2022), iha Parlamentu Nasional.

Jose Belo esplika, dadauk ne´e CNE ba Orsamentu Jeral Estadu tinan fiskal 2023, simu det dolares miliaun 10. Hosi miliaun 10, miliaun 6 ba subvensaun publika ba partidu sira.

Addisional orsamentu ne´e, maka CNE hato´o ona ba Komisaun A PN hodi bele konsidera hodi uza ba rekrutamentu.

“Ita aumenta osan ne’e iha 2.3 miloens ne’e liliu ba rekrutamentu ofisial sira para atu bele koloka iha sentru hotu-hotu. Tamba foin lalais ajuda tebes resultadu ne’ebe iha sentru iha estasaun de votu antes Ita bele halo apuromentu nasional,” nia dehan.