Chellin, Efivirna no Saunzinha, Raider Buibere iha Eventu PIT Road Race 2023

DILI, www.news-viptv.com – Pertamina Internasional Timor (PIT) Road Race 2023 alende husik istoria furak iha eventu ne’e tantu raider sira ne’ebe sai kampiaun no mos prezensa raider hosi Indonesia, eventu road race ne’e mos iha istoria uniku ida ho prezensa Chelin Valentina, Efivirna do Carmo, no Saunzina Soares nu’udar raider Buibere sira ne’e mos brani kompete ho raider mane sira, inklui compete ho raider Indonesia sira ne’ebe sempre sai kampiaun iha kualker eventu.

Dada lia ho jornalista VIP TV, tantu Chelin, Efivirna no Saunzinha hateten maski eventu ne’e nakonu ho risku, nu’udar feto sira mos hakarak hatudu sira nia talentu iha desportu moto siklismu ne’e.

“Ba kolega feto sira ne’ebe iha talenta hanesan, mai ita hatudu ita nia nakar atu labele hatudu iha Estrada, maibe koko hatudu iha arena (sirkuit) laran hodi hatudu ita nia talent ba mundu,” komentariu Chelin Valentina, Raider ran Ermera ho Bobonaro ne’e ba VIPTV, Sabadu (19/8/2023), iha Sirkuit Tasi Tolu, Dili.

Chelin konta, nia hahu nia kareira nudar raider wainhira iha tinan 6 no hetan suporta hosi nia aman ho inan ne’ebe sempre akompana nia wainhira compete iha eventu ne’ebe deit nia partisipa.

“Road Race ne’e mos hanesan hau nia hobby ida, maski risku, maibe hau nia familia supporta nafatin,” dehan Raider ho idade 16 no sei estuda iha Colegio Paulo VI Dili.

Lia hanesan mos hato’o hosi raider ho naran kompletu Efivirna Rurina Marcal do Carmo hateten, eventu Road Race ne’e nu’udar kompetisaun dahuluk ne’ebe nia tuir tamba hetan mos supporta hosi nia aman (Ercilio Martins Marcal, Ainaro) ho inan (Francisca Gomes dos Santos, Ermera).

Hatene kona ba motor nian tamba servisu mos ho nia aman iha officina motor nian, Efivirna esplika nia desidi sai raider desde sei idade tinan 16, maski dadauk ne’e nia tinan tama ona ba 23.

“Hau hatene eventu ne’e nakonu ho risku, maibe ho fuan bo’ot hau mos desidi tuir kompetisaun ne’e,” dehan raider ne’ebe dadauk ne’e nu’udar estudante estajiada ba formasaun dos professore iha Municipio Ermera husi Universidade Nasional Timor Lorosa’e (UNTL).

Nune’e mos Saunzinha da Costa Soares, raider ho idade tinan 15 ne’ebe dadauk ne’e eskola hela iha Escola Café Ermera, ninian prezensa iha eventu road race mos hetan supporta hosi nia aman Donato Sores Maia husi Ermera Mirtutu no Mae Joana Maria da Costa Ximenes husi Baucau.

“Se mane bele, entaun hau mos hakarak hatudu kata kami feto mos bele compete iha eventu ne’e. Maski hau sedauk hetan kampiaun, maibe hau fiar katak tempu id ahau sei hetan,” dehan Sauzinha.

PIT Road Race 2023 realiza hosi Federasaun Moto Ciclimo Timor-Leste (FMC-TL) iha Sirkuit Tasi Tolu, Dili durante loron 3 hahu 18 to’o 20 Agostu 2023 ho objetivu hodi komemora loron aniversariu FALINTIL ba dala 48.

Vise Prezidenti FMC-TL, Helder Vieira esplika road race ne’e hetan partisipasaun hosi raider nain 105, inklui raider Indonesia.

“Iha eventu road race ne’e participante sira husi nasaun vizinho Indonesia ekipa hitu no total ema nain-30. Ekipa Timor-Leste hamutuk 25,” dehan Helder Vieira

Hamutuk iha klase 21 ne’ebe loke iha eventu ne’e hanesan Klase Matic fahe ba klase 3: Matic 115 CC Standar (Pemula), Matic 130 CC Standar MP7 (fahe tan klase 3), no Matic 155 CC Tune Up. Klase Bebek; Bebek 2 Tak Campuran 115-125 CC, Bebek FFA 2 Tak-4 Tak (2T s/d 125 CC, 4T s/d 155 CC), Klase Sport; King 115-150 CC, Ninja 150-200 CC, Campuran 2 Tak King & Ninja 150-200 CC, no Sport FFA (Bebek Sports 150-200 CC).

Ba Klase SuperMoto; Trail 150 Standar, Trail 150-200 CC Tune Up, SE 85 CC, no SE 250 CC. Ba klase Open Internasional, Matic 130 CC standar MP7, Matic 155 CC Tune Up, Campuran King Ninja 150-200 CC no Campuran Bebek 2T.

Iha eventu ne’e mos loke klase ba Veteranos & Sponsor maka klase Matic 130 CC standar MP7.

Total orsamentu ne’e FMC-TL hasai ba eventu ne’e hamutuk US$ 40.000 ne’ebe hetan apoiu hosi Ministerio Juventude, Desportu, Arte no Kultura, Pertamina Internasional SA, Haksolok Group, Bank Mandiri Timor Leste, Yamaha ESM, Brother Motor, Maxxis Tires, JDL 89, MAX ADS, Novo Turismo, Jenic, Zefra, Chrame Unipesoal Lda, Grafika Taliti, SM, HV Store no HF.