CCLN Aprezenta Lista Kondekorasaun Veteranu no Frente Externa ba Xefi Estadu

Dili, www.news-viptv.com – Conselho Combatentes Libertação Nacional (CCLN) lori ona lista Veteranu no Frente Externa ne’ebe sei hetan kondekorasaun hosi estadu iha seremonia komemorasaun loron proklamasaun independensia 28 Novembro.   

Lista ne’e aprezenta hosi Primeiro Vise CCLN, João Miranda “Aluc” ho nia estrutura balun ba Prezidente Republika, Jose Ramos-Horta, Tersa (14/11/2023), iha Palasiu Presidensial, Dili.

“28 de Novembru agora hanoin atu kondekora ba Ita nia maluk sira ne’ebe mak uluk fo nia partisipasaun ba prosesu iha funu naruk ne’e mais seidauk hetan oportunidade hodi hetan kondekorasaun ne’e ba permeiru pontu. Ba segunda pontu, Ami lori lista husi Ita nia maluk sira ne’ebe mak uluk fo nia partisipasaun ba prosesu funu iha diaspora no Frente externa,” informa Aluc ba jornalista sira.

Aluc esplika, ba Timoroan sira iha diaspora ne’ebe uluk kontribui iha frente externa, xefi estadu mos konese diak ema sira ne’e, tamba ne’e lori hodi verifika sira nia identidade lolos, nune’e bele mos hetan rekonesementu hosi estadu ba sira nia kontribuisaun luta nian.

Ba kondekorasaun nian, Aluc esklarese, sira ne’ebe sei hetan kondekorasaun hsoi munisipiu sira sei realiza kondekorasaun iha ida-idak nia munisipiu.

Dadauk ne’e CCNL rejista ona hamutuk ema rihun rua.  “Ita Hotu hatene katak faze da registu nee iha rua.  Primeiru faze da registu ne’e iha 2003-2005 no balun sei pendente no iha hela reklamasaun. Segundo faze ne’e rejistu 2009 iha setenta I tal mill, kuaze ointenta, iha segundo rejistu nebe mak halo iha 2009, seti i vinte tal mill rejistrados ne’ebe maka agora iha faze verifikasaun”.

Wainhira verifikasaun hotu, prosesu tuir kedan maka faze de validasaun. “Faze de validasaun ne’e mak Ita foin hare sese maka merese atu hetan rekonesementu i valorizasaun husi parte Governu”.