Aniceto: FRETILIN Laiha Istoria Vota Kontra PR ba Rai Liur

DILI, www.news-viptv.com – Votasaun unamidade Parlamentu Nasional ba vizita estadu Prezidenti Republika (PR) Jose Ramos Horta ba rai liur hatudu katak istoriamente Partidu FRETILIN sedauk iha istoria vota kontra ba servisu PR.

Prezidenti Parlamentu Nasional, Aniceto Guterres esplika Partidu FRETILIN respeita nafatin servisu PR nu’udar xefi estadu no sei la kahur problema ruma satan hodi blokeia PR.

“Prezidenti da Republika halo nia atividade, parlamentu bele iha kompetensia atu autoriza ga la autoriza. Mais labele orgaun ida blokea fali  atividade ba orgaun seluk satan xefi estadu. FRETELIN ita bo’ot sira hatene, istoria parlamentu nia nunka vota kontra Prezidenti da Republika. Hateten tok mai ita bo’ot sira akompanha iha ne’ebe mak FRETILIN vota kontra,” deklara Aniceto Guterres ba jornalista sira, Kuarta (13/7/2022), iha Uma Fukun Parlamentu Nasional, Dili.

Aniceto esklarese tan, “Xefi estadu ne’e reprezentadu estadu tomak. Nia la reprezenta ema ida ga grupo ida, nia la reprezenta partidu ruma. Tamba ne’e satan sai ba liur ne’e reprezentadu estadu tomak. Se ita iha problema internu ruma, labele uza fali problema internu para atu blokea prezidenti.”

Iha plenaria Parlamentu Nasional Kinta (12/7/2022), PN aprova viazem PR Horta ba Indonesia ho votos afavor 60 kontra 0, abstensaun 0.

Tuir planu PR Horta sei vizita Indonesia hahu 18 to’o 24 Jullu 2022 hodi hasoru malu ho Prezidenti Republiak Indonesia, Joko Widodo.

Vizita PR Horta ba Indonesia, nu’udar vizita estadu dahuluk desde asumi kargu iha 20 Maiu 2022.