Alkatiri Deklara FRETILIN Vota ba Lu-Olo

DILI, www.news-viptv.com – Sekretariu Jeral Partidu FRETILIN, Mari Bim Amude Alkatiri deklara atu Partidu FRETILIN nia votos hotu ba kandidatura Francisco Guterres Lu-Olo iha Eleisaun Prezidensial 19 Marsu 2022.

Alkatiri mos informa nia respeitu Tanente Jeneral Lere Anan Timur, maibe nia afirma dala ida tan ba makina Partidu FRETILIN hotu atu tun ba baze hodi apela ba militante no simpatizante Partidu FRETILIN hodi vota Lu-Olo.

“Hau iha ne’e atu re-afirma katak (Partidu) FRETILIN apoiu Lu-olo,” deklara Alkatiri iha konferensia imprensa, Kinta (27/1/2022), iha Sede Nasional Partidu FRETILIN, Comoro, Dili.

Maski Alkatiri rekonese Lu-Olo avansa nudar kandidatura independente, hare ba nia kandidatura antes ne’ebe Partidu FRETILIN maka apoiu, Partidu FRETILIN sei kontinua nia apoiu ba Lu-Olo.

“Lu-Olo nia vizaun, vizaun inklusiva no nasional, no hakarak kontinua nia programa hodi hametin estadu no kontribui ba dezemvolvimentu nasional, tamba ne’e FRETILIN sei apoiu Lu-Olo,” dehan Alkatiri.

Iha parte seluk, Alkatiri mos hatoo nia tristeza no laran taridu ba kandidatu prezidentu seluk ne’ebe avansa hodi hamosu krizi foun.

“Hau triste no laran taridu kuandu iha kandidatu hakarak hamosu krizi,” nia hateten.