ADVETORIAL SECOMS: Muskulu, Determinasaun, no Mehi sira — Viajen Karreira Atleta Feto iha Mundu Fizikulturista

DILI, www.news-viptv.com – Koalia kona ba modalidade desportu fizikultura ou bodybuilding ema hotu nia hanoin barak maka hanoin ba mane deit tamba modalidade ne’e dala barak hatudu kona ba muskulu isin lolon nian.

Maibe la seluk ho atleta feto fizikulturista nain 3 maka  Flora Verdial Tilman (tinan 28), Agustina Ursula da Costa (26) no Maria Balbina do Rego (tinan 30), ne’ebe maski kulturamente saida maka sira hatudu iha desportu ida ne’e dala barak ema hateten kontra kultura Timor, maibe lae ba sira, tamba iha desportu ida ne’e hatudu ba mundu katak Timor-Leste mos iha atleta ba fiziku kultura nian ba feto.

Treina hamutuk hela iha Gym Basecamp Fatuhada, fizikulturista feto nain 3 ne’e seriu hela bo’ok besi todan oioin iha fatin gym ne’e ho objetivu halo fit nafatin sira nia isin lolon no kontinua forma muskulu ba sira nia lolon ida-ida.

“Desportu ne’e nia modelu mak ne’e ona, maibe laos dehan la diak, maski balun koalia oi-oin maibe hau orgullu bele sai atleta iha nmodalidade ne’e,” deklara Flora Tilman ne’ebe ikus sai kampiaun ba kategoria feto nian iha kompetisaun nasional tinan 2024.

Ba Flora ne’e laos titlu kampiaun dahuluk, antes iha 2023 nia mos hetan kampiaun hotu, antes sai deit runner up (juara 2) iha tinan 2022.

“Hau sente kontenti bele hetan prestasaun nasional no hanoin atu bele compete iha nivel internasional. Hau nia mehi mak ne’e, espera iha loron id abele reprezenta Timor-Leste iha kampionatu internasional,” espera Flora.

Iha desportu ne’e Flora hetan apoia husi nia famili no kolega sira ne’ebe gosta mos ba modalidade ne’e.

Desportu ne’e, tuir nian diak ba ema nia saude no bele Hadia isin liliu muskulu nian. “Hau hanoin desportu ne’e importante ba ita no hau ekoraja ba maluk feto sira bele treinu mos iha desportu ne’e.

Ba Agustina Ursula da Costa (Tinan 26) hare katak modalidade desportu ne’e importante los ba Timor-Leste, liliu feto Timoroan sira ne’ebe treina ona ba desportu ne’e.

Ho desportu ne’e nia husu ba federasaun ne’ebe tau matan ba modalidade ne’e atu kria nafatin kompetisaun nasional ba kategoria feto nune’e feto mos bele compete ba malu no hatudu ba mundu Timor-Leste mos bele.

“Laos federasaun deit, husu ba governu liu husi MJDAK atu bele koopera ho federasaun ba desportu ne’e hodi halo programa kompetisaun tinan-tinan, nune’e Timor-Leste bele hamosu atleta ne’ebe bele compete iha nivel internasional mos,” nia komentariu.

Maski foun ba Maria Balbina do Rego “Nina” ho idade ba tinan 30, nia hili ona modalidade ida ne’e hodi forma ka hadia mos nia isin.

“Hau sedauk compete iha kompetisaun ruma, maibe depois hau treinu, kolega sira enkoraja hau atu bele mos tuir kompetisaun no hau sei hare ida ne’e,” dehan Nina.

Nono Governu Konstitusional iha nia politika ba desportu kontinua tau prioridade ba modalidade desportu sira ne’ebe ezisti iha Timor-Leste hodi halo kompetisaun nasional nunee bele hamosu atleta kualidade no bele reprezenta Timor-Leste iha nivel internasional.

Maski sedauk hamosu barak fisikulturista feto sira iha Timor-Leste, husi esperansa nain 3 ne’e ho realizasaun kampionatu nasional ba feto bele hamosu barak liu tan atleta sira ba modalidade ne’e iha futuru.