PLA: F-FDTL iha Progresu Pozitivu iha Modernizasaun no Kapasidade Defende Soberania

DILI, www.news-viptv.com – Forsa Defeza Xina ou People’s Liberation Army (PLA) rekonese katak FALINTIL-Forsa Defeza de Timor-Leste (F-FDTL) iha progresu pozitivu durante iha lideransa Nono Governu Konstitusional liliu iha modernizasaun no kapasidade defende soberania.  

F-FDTL, esplika Adidu Defeza Embaixada Xina iha Timor-Leste, Koronel Miao Haijun iha loron selebrasaun aniversariu PLA ba tinan 98, hetan duni progresu pozitivu iha modernizasaun, no kapasidade atu defende soberania, direitu no interesse ba tasi, no paz-estabilidade rejionál.

Ho progresu pozitivu, iha Ministru Defeza Timor-Leste, Donaciano Costa Gomes alias Pedro Klamar Fuik nia oin, adidu defeza ne’e hateten Xina komitmentu atu hametin nafatin relasaun bilateral iha area defeza ho Timor-Leste.

“Iha tempu mai-fali, Xina prontu atu hamutuk ho Timor-Leste atu planifika dezenvolvimentu relasaun defeza bilateral, no atu profunda kooperasaun konkretu, hamutuk halo foti ba dezafiu seguransa global,” hateten Koronel Miao Haijun iha nia deskursu offisial.

Hodi hatutan, “Hamutuk, ita presiza rezistu forma hotu-hotu husi hegemonizmu no polítika poder. Ami sei kontinua fó kontribuisaun hodi harii komunidade ho destino komun no atu garante paz no estabilidade mundiál no rejionál”.

Ba Xina nia komitmentu ne’e, Ministru Defeza Pedro Klamar Fuik hateten, Timor-Leste komitmentu ho governu Xina, liu-liu hodi bele hametin liu tan kooperasaun entre país rua iha setór defeza hodi kontinua moderniza no profisionaliza Forsas Armadas Timor-Leste nian atu nune’e bele iha auto-sufisiente hodi bele proteje soberania RDTL nian.

“Ba Exército de Libertação Popular Xina nian, iha loron espesiál ida ne’e, ami extende ami-nia parabéns sinsera. Hein katak ita-boot sira nia misaun kontinua lori paz no seguransa ba komunidade no povu Xina; no bele hada’et paz ba mundu”, hateten Kontra-Almirante Pedro Klamar Fuik.

Governante ne’e mós salienta katak, iha situasaun mundiál, liu-liu tensaun geopolítika ne’ebé kontinua aumenta no presaun geopolítika ne’ebé ema barak sente iha fatin-fatin; Timor-Leste kontinua reafirma nia komitmentu ho dalan diálogu, diplomasia no rezolusaun ba paz. No rejeita violénsia nu’udar dalan atu solusiona konflitu.

“Ami rejeita violénsia nu’udar forma ida atu rezolve konflitu no kontinua fiar metin katak paz duradoura bele de’it harí liu husi komprensaun mútua no respeita ba direitu internasional sira”, subliña S. E. Ministru Defeza.

Hola prezensa iha selebrasaun ne’e, Assesor Prezidenti Republika, Tenente General reformadu, Lere Anan Timur, Brigadeiru General, Maunana, Komodoro Higuino das Neves, Komandante Jeral PNTL, Komisariu Henrique da Costa no komunidade Xinesa iha Timor-Leste.