Fim Setembru, Blanko Passporte Foun Sei To’o

DILI, www.news-viptv.com – Relasiona ho nesesidadun sidadaun sira ne’ebe persiza halo passporte hodi halo viazem ba rai liur, Ministru Justisa, Amandio da Sa Benevides informa blanko passport foun sei too iha fim Setembru.

“Kaderneta Pasaporte sei to’o iha fulan ne’e remata. Tamba agora dadaun kompania sei halo hela impresaun nune’e ami seidauk hatene data fixu tamba sasan sira lori mai Timor ne’e sei liu husi aviao kargu tamba ne’e waihira kompania halo hotu ona entaun lori mai Timor ona,” hateten Amandio ba jornalista sira, iha Palacio do Governo, Tersa (19/9/2023).

Ho nune’e, ministru justisa ne’e husu ba sidadaun sira tantu estudante, atleta no sira ne’ebe hakarak halo viazem ho objetivu ketak-ketak atu pasiensia.

“Ba atividade ne’ebe sei realiza iha rai liur hanesan atleta sira, ita pasiesia, tamba ida nee mak ita preokupasaun duni, nune’e ida ne’e mak ita nia situasaun agora no ita sei hein deit husi fulan ne’e remata,” dehan Amandio.

Situasaun blanko passporte hotu wainhira iha governasaun VIII Governu Konstitusional iha lideransa Primeiro Ministro Taur Matan Ruak. Iha governasaun ne’e mos iha mudansa dala rua ba ministru justisa nian maka Manuel Carceres no Tiago Sarmento.