Partidu Demokratiku Prontu Ukun iha 2023, Kampu Servisu ba Jovem Sai Prioridade

Dili, www.news-viptv.com – Kria kampu servisu ba jovem sira no buka alternativu foun ba rendementu estadu nian sai prioridade ba Partidu Demokratiku nia governasaun wainhira hetan konfiansa hosi povu hodi ukun iha governu.

Tamba ne´e, atu prepara ukun nain sira ne´ebe servi iha governasaun, Partidu Demokratiku realiza posse ba estrutura partidu nian ne´ebe sei prepara programa Partidu Demokratiku ba futuru governu tuir mai.

Ba VIP TV, Presidenti Partidu Demokratiku, Mariano Assanami Sabino hateten, PD sei nakloke ba partidu politiku ne´ebe deit maka sei ukun iha governu tuir mai.

Iha fatin hanesan, Francisco Maukura Fernandes ne´ebe simu posse nudar Xefi Departementu negosiu Estranjeiru no Koperasaun prontu apoia governu foun tuir manual politika Partidu demokratiku nian hodi oinsa halo politika externa ne´ebe dinamiku no estratejiku hodi aselera dezemvolvimentu nasional.

Partidu Demokratiku harii desde tinan 2000 iha kedan Assembleia konstituante no iha esperensia ukun iha governu hamutuk ho partidu boot sira iha Timor-Leste hanesan ho CNRT iha tinan 2007 too 2015 no FRETILIN iha 2017 too 2018.

Iha 2018, Partidu Demokratiku sai opozisaun hamutuk Partidu CNRT no partidu kiik tolu seluk iha Parlamentu Nasional.