DILI,20 Novembru 2026(VIPTV) – Prezidente Repúblika Timor-Leste, José Ramos-Horta, husu ba autoridade judisiál no polísia kompetente sira atu hala’o investigasaun rigorozu kona-ba mate trájiku foin-sa’e Palomita Gusmão Guterres, enkuantu Xefe Estadu hato’o ninia kondolénsia no solidariedade ba família enlutada.
Liu husi karta ofisiál ida ne’ebé dirije ba família enlutada iha Matadouro, Suku Mascarenhas, Prezidente Ramos-Horta manifesta tristeza no konsternasaun kle’an tanba lakon vida foin-sa’e nian ne’e, ne’ebé nia konsidera nu’udar akontesimentu trájiku no dolorozu ba família no komunidade.
Iha karta kondolénsia ne’e, Xefe Estadu reafirma ninia solidariedade no proximidade ho família Palomita nian, ne’ebé agora hasoru momentu susar no laran-moras tanba lakon ema ne’ebé sira hadomi.
“Liafuan ida mós labele kura tomak triste ka laran-moras ne’ebé mosu tanba akontesimentu ne’ebé derrepente tebes ida-ne’e,” dehan Prezidente Ramos-Horta, hodi fahe mós sentimentu triste ne’e ho família no komunidade.
Iha parte seluk, Prezidente Repúblika hato’o apelu forte ba autoridade judisiál no polísia kompetente sira atu hala’o prosesu legál hotu ho rigor, dedikasaun no determinasaun máximu.
Nia subliña katak faktu hotu-hotu kona-ba akontesimentu ne’e tenke hetan apuramentu ho loloos, atu justisa bele hala’o tuir lei, hodi garante respeitu ba memória Palomita Gusmão Guterres, ninia família no prinsípiu Estadu de Direitu.
Prezidente mós enfatiza importánsia atu autoridade kompetente sira kumpre sira-nia responsabilidade iha prosesu investigasaun, hodi bele asegura katak justisa la’ós de’it sai hanesan direitu ba família matebian, maibé mós nu’udar obrigasaun iha Estadu de Direitu.
Iha parte ikus husi ninia mensajen, Prezidente Ramos-Horta harohan ba Maromak Kbiit-Na’in atu simu klamar Palomita iha deskansa eternu no fó forsa, aten-brani no dame ba família enlutada, ema ne’ebé nia hadomi no ema hotu ne’ebé besik ba nia.
Mensajen kondolénsia hosi Xefe Estadu ne’e hatudu solidariedade ba família Palomita Gusmão Guterres nian, no reafirma mós nesesidade atu autoridade kompetente sira apura akontesimentu ne’e ho loloos no tuir lei.
Xefi Estadu Husu Investigasaun Rigorozu Kona-Ba Mate Trájiku Palomita













