DILI, 20 NOVembru 2026 (VIP TV) – Hametin relasaun diplomátika no haburas kooperasaun internasionál sai nu’udar prioridade importante ba Timor-Leste, liuliu bainhira nasaun ne’e prepara an atu hala’o knaar nu’udar Prezidénsia ASEAN iha tinan 2029. Prezidente Repúblika, José Ramos-Horta, hato’o apelu ba nasaun parseiru sira atu hametin kooperasaun iha área komérsiu, edukasaun, dezenvolvimentu sustentável no seguransa rejionál.
Apelu ne’e hato’o Prezidente Ramos-Horta bainhira simu karta kredensiál husi embaixadór na’in 13 ne’ebé foin akreditadu ba Timor-Leste, iha serimónia ofisiál ne’ebé hala’o iha Palásiu Prezidensiál Nicolau Lobato, Dili, iha loron 18 Novembru 2026.
Apresentasaun karta kredensiál ne’e marka inísiu formál ba misaun diplomátika husi embaixadór sira ne’ebé sei reprezenta sira-nia nasaun iha Timor-Leste.
Embaixadór na’in 13 ne’e reprezenta nasaun Áustria, Béljika, Repúblika Cheka, Fiji, Guatemala, Mongólia, Polónia, Qatar, Sri Lanka, Suisa, Israel, Lituánia no Nikarágua.
Husi total embaixadór na’in 13, na’in 10 rezidente iha Jakarta, Indonézia, na’in ida rezidente iha Singapura, na’in ida rezidente iha Canberra, Austrália, no na’in ida rezidente iha Hanoi, Vietnam.
Iha serimónia ne’e, Prezidente Ramos-Horta hato’o parabéns ba embaixadór sira ne’ebé foin simu akreditasaun diplomátika no reafirma Timor-Leste nia kompromisu atu aprofunda relasaun bilaterál ho nasaun ida-idak.
Prezidente konsidera katak embaixadór sira iha papél importante nu’udar ponte entre Timor-Leste ho sira-nia nasaun, liuhusi amizade, diálogu no kooperasaun iha área sira ne’ebé fó benefísiu ba parte hotu.
“Ohin, ita simu reprezentante sanulu-resin-tolu ne’ebé sai hanesan ponte entre Timor-Leste ho sira-nia nasaun. Timor-Leste valoriza amizade sira ne’ebé ami kuda ona dezde ami-nia independénsia, no ami hein atu hametin kooperasaun iha área sira ne’ebé iha interese mútuu, husi reziliénsia klimátika no dezenvolvimentu sustentável ba edukasaun, komérsiu, no seguransa rejionál,” afirma Prezidente Ramos-Horta.
Iha ninia deklarasaun, Prezidente Ramos-Horta subliña katak Timor-Leste hakarak kontinua hametin amizade ne’ebé harii ona ho nasaun parseiru sira dezde restaurasaun independénsia.
Área reziliénsia klimátika no dezenvolvimentu sustentável mós sai parte importante husi kooperasaun ne’ebé Timor-Leste hakarak avansa hamutuk ho parseiru internasionál sira.
Iha área edukasaun no komérsiu, kooperasaun internasionál bele sai dalan atu dezenvolve relasaun entre nasaun sira no avansa interese komún. Enkuantu iha área seguransa rejionál, Timor-Leste kontinua valoriza diálogu no kolaborasaun ho parseiru sira.
Prezidente Ramos-Horta mós destaca katak preparasaun ba knaar Timor-Leste nu’udar Prezidénsia ASEAN iha tinan 2029 presiza apoiu, parseria no solidariedade husi nasaun sira iha mundu tomak.
Nia afirma katak Timor-Leste kontinua hametin ninia integrasaun iha komunidade rejionál no globál, no espera atu servisu hamutuk ho parseiru internasionál sira.
“Bainhira ami prepara ba ami nia knaar iha ASEAN iha tinan 2029 no kontinua ami-nia integrasaun iha komunidade rejionál no globál, ami konta ho parseria no solidariedade husi ita-nia belun sira iha mundu tomak,” dehan Prezidente.
Knaar nu’udar Prezidénsia ASEAN iha 2029 sei sai responsabilidade importante ba Timor-Leste atu kontribui iha dezenvolvimentu komunidade rejionál no hametin relasaun ho nasaun sira iha Sudeste Aziátiku.
Iha parte ikus, Prezidénsia Repúblika reafirma Timor-Leste nia kompromisu atu servisu besik ho misaun diplomátika sira hotu hodi avansa prioridade komún no hametin kooperasaun internasionál.
Akreditasaun embaixadór na’in 13 ne’e hatudu kontinuidade esforsu diplomátiku Timor-Leste nian atu hametin amizade, dezenvolve relasaun bilaterál no haburas parseria internasionál, enkuantu prepara an ba responsabilidade nu’udar Prezidénsia ASEAN iha 2029.













