MANILA(VIPTV)– Primeiru-Ministru Timor-Leste, Kay Rala Xanana Gusmão, ho delegasaun ofisiál, to’o ona iha Manila, Repúblika Filipinas, iha loron 14 Novembru 2026, atu partisipa iha 49º Simeira ASEAN no Enkontru Relasionadu (49th ASEAN Summit and Related Summits).
Delegasaun Timor-Leste to’o iha Ninoy Aquino International Airport (NAIA), Terminal 3, no simu diretamente hosi Mayor Pasay City, Imelda Calixto-Rubiano, iha serimónia simu ofisiál ne’ebé akompaña ho onra no parada militár.
Prezensa Primeiru-Ministru Xanana Gusmão iha Manila reprezenta kompromisu Timor-Leste atu kontinua hametin nia envolvimentu iha prosesu integrasaun rejionál no kontribui ba kooperasaun entre nasaun sira ASEAN.
49º Simeira ASEAN no Enkontru Relasionadu sei hala’o hosi 11 to’o 18 Novembru 2026, ho partisipasaun hosi líder sira Estadu-Membru ASEAN, parseiru diálogu no reprezentante organizasaun internasionál.
Partisipasaun Timor-Leste iha enkontru importante ida-ne’e sei fó oportunidade ba Primeiru-Ministru Xanana Gusmão atu partisipa iha diskusaun estratéjika no enkontru iha nível lideransa, ho objetivu atu hametin kooperasaun rejionál, promove interese nasionál no kontribui ba esforsu hamutuk hodi asegura estabilidade, dezenvolvimentu ekonómiku no prosperidade iha rejiaun.
Hafoin serimónia simu iha aeroportu, Primeiru-Ministru ho delegasaun kontinua viajen ba Manila Hotel, ne’ebé sei sai baze prinsipál ba atividade ofisiál sira durante nia vizita iha Manila.
Durante vizita ne’e, Xanana Gusmão mós sei partisipa iha enkontru preparatóriu iha nível funsionáriu sénior no ministru sira, molok kontinua ba enkontru iha nível Xefe Estadu no Xefe Governu sira iha kuadru 49º Simeira ASEAN no Enkontru Relasionadu.
Primeiru-Ministru Xanana Gusmão akompaña hosi Xefe Gabinete Primeiru-Ministru, Elizabeth Exposto, no membru delegasaun ofisiál sira seluk.
Partisipasaun Timor-Leste iha simeira ne’e konsidera nu’udar oportunidade importante atu hametin relasaun diplomátika, promove interese estratéjiku nasionál no afirma papel Timor-Leste iha ASEAN, liuliu iha esforsu konstrusaun futuru rejionál ne’ebé bazeia ba unidade, kooperasaun no dezenvolvimentu sustentável.
