La hadia Estrada Munisipiu Viqueque, UEUMV “Ameasa” La Vota iha Eleisaun

DILI, www.news-viptv.com  – Uniaun Estudante Universitariu Munisipiu Viqueque (UEUMV), ezije ba IX Governu Konstituisional atu tau atensaun urjente no hadia ba kondisaun estrada no ponte iha Munisipiu Viqueque, se la hadia sira “ameasa” la vota iha eleisaun tuir mai.

Iha Konferensia imprensa, Porta Voz UEUMV, Apolinariu da Silva hateten katak dezemvolvimentu Estrada iha Munisipiu Viqueque hakdasak tebes maski munisipiu ne’e riku ho rekursu naturais.

Ho Estrada ne’ebe ladun diak fo impaktu tebes pupulasaun iha postu administrativu Ossu, Viqueque Vila, Lakluta, Uatulari no Uatucarbau.

“Problema hirak ne’e fo prejuizu boot ba populasaun sira atu assesu Estrada hodi halo movimentu ba mai, no difisil atu lori produtu ba assesu merkadu, assesu ba ospital, eskola no assesu ba movimentu transporte publiku,” dehan Apolinariu da Silva, Sesta ( 22/05/2026), iha Jardim 5 de Maio Colmera, Dili.

Ho dezemvolvimentu ne’ebe hakdasak, UEUMV ejiji ba governu atu hadia estrada no ponte sira ne’ebe aat iha sira nia munsipiu.

“Hadia estrada iha Viqueque Vila, reabilita estrada ba Ossu, kore estrada no ponte ba Lakluta inklui ponte Welolo no ponte Dilor ne’ebé daudaun ne’e kotu iha Suco Uma-tolu, no hadia estrada ba Uatulari no Uatucarbau inklui harii ponte iha mota beaço ho Ailembata,” nia informa.

Membru UEUMV, Nelson Manuel Ximenes husu ba Ministru Obras Publikas, Samuel Marcal atu tau matan duni ba situasaun estrada ne’ebe sira mensiona ona, nune’e mos hanesan iha munisipiu seluk.

“Kuandu Xanana molok atu tun baze iha Viqueque ne’eba, sira atiru dalan, Samuel (ministru) ne’e, tuir Xanana ba para ateru dalan iha ne’eba, mais liu tia iha ida-ne’e, Viqueque rai mamuk tia fali, ida-ne’e mak ba ami estudante la satisfas. La’os ba ami Viqueque oan de’it inklui mos ba 13 munisipiu, tenki tau matan ba estrada sira ne’ebe, Samuel lao tun la’o sae ne’e, labele promete falsu favor ida. Se lakoi ida-ne’e tan, ami Viqueque ami sei la vota iha 2027,” dehan Nelson Manuel Ximenes.

Antonio Gomes nudar Membru mos husu ba Primeiru Ministru Xanana Gusmão atu realiza promesa sira ba hadia estrada Munsipiu Viqueque nian.

“La bele hein to’o tempu kampanha mak tun ba area rural sira hodi bosok no husik hela promesa falsa ba komunidade sira,” nia dehan.