Xefi Estadu Sei Prezensa iha Seminariu Internasional Direitus Humanus iha Rejiaun Fronteira

Dili, www.news-viptv.com – Prezidente Repúblika, Jose Ramos-Horta sei hola prezensa ba konvite Provedór ba Direitus Umanus no Justisa (PDHJ) hodi partisipa seminariu internasional kona ba direitus humanus iha rejiaun fronteira.

Provedór ba Direitus Umanus no Justisa (PDHJ), Virgilio da Silva Guterres ‘Lamuka’ hafoin inkontru ho PR Ramos-Horta hateten, semináriu ne’ebé organiza husi Fórum Sudeste Aziátiku iha Institutu Nasionál Direitus Umanus no lidera husi PDHJ, sei foka liu ba direitu ekonómiku, sosiál, no kulturál iha área fronteira sira.

“Seminariu aban ne’e ami konvida oradores sira no mos parseiru PDHJ nian atu fahe esperensia konabá situasaun Ekonomiku Social Kultural iha area fronteira,” dehan Virgilio ba jornalista sira, Kuarta (20/11/2024, iha Palasiu Prezidensial Dili.

Prezidente nia partisipasaun iha abertura semináriu ne’e destaka Timor-Leste nia kompromisu ba kooperasaun rejionál no avansu direitus umanus.

Sorumutu internasionál ida-ne’e reprezenta plataforma importante ida atu fahe esperiénsia no dezenvolve estratéjia sira atu proteje no promove komunidade sira-nia direitu iha área fronteira sira iha rejiaun tomak.