Xanana: Max Stahl Heroi Timor-Leste

DILI, www.news-viptv.com – Xefi Delegasaun Delimitasaun Fronteira Maritima, Xanana Gusmao hateten Max Stahl nu’udar heroi Timor-Leste.

“Max Stahl heroi ami nia nasaun,” hakerek Xanana Gusmão iha nia karta kondolensia ba kaben Max Stahl, Dra. Ingrid Bucens.

Liu hosi karta refere, Xanana dehan Max Stahl jornalista ida ne’ebé kuriozu hodi fó sai ba mundu injustisa ne’ebé akontese atu mundu bele rona no hatene. Max Stahl nia serbisu oinsá bele muda destinu nasaun nian.

“Max Stahl nia filmazem sira hosi Masakre Santa Cruz, hatudu nia foti risku boot ba nia an, atu hatudu ba mundu pontu kulminante hosi luta timor nian,” dehan Xanana iha karta ne’e.

Iha nia lia fuan ikus, Xanana hateten katak nia hatene ne’e nudar tempu defisil ba Ingrid ho familia, Xanana nia profunda kondolensia atu hatudu katak nia hanoin Max Stalh no nia kontribuisaun ba Timor-Leste.

Max Stahl moris iha Inglatera, 6 Dezembru 1954 ho naran Cristopher Wenner. Hetan rekonesimentu hosu estadu Timor-Leste ho Ordem Grande Colar tamba nia kontribuisaun ba prosesu luta libertasaun povu Timor-Leste liu hosi nia filmazem ba Masacre 12 NOvembru 1991.

Hetan nasionalidade espesial Timor-Leste nian iha Novembru 2019.

Durante era independensia, Max Stahl kontinua fo nia an ba Timor-Leste hodi harii Centro Audio-Visual Max Stahl hodi arkiva istoria importante Timor-Leste nian.