Vizita Timor-Leste, Catherine West Haforsa Parseria Reinu Unido ho Timor-Leste

DILI, www.news-viptv.com –  Membru Parlamentu Reinu Unido ne’ebe asumi mos kargu Sub Sekretária Estadu Parlamentar Indo-Pasifiku, Catherine Elizabeth West halo vizita ba Timor-Leste hodi haforsa parseria Reinu Unido nian ho Timor-Leste.

Iha nia vizita mai Timor-Leste, hafoin inkontru ho Primeiru Ministru Kay Rala Xanana Gusmão, Catherine West hateten Reinu Unido kontinua nia apoiu ba Timor-Leste hodi dezemvolve an nudar nasaun prosperu.

“Nasaun rua ne’e sai ona belun iha tempu naruk no Reinu Unidu sai ona hanesan uma ba Timor oan lubuk ida iha rai liur, no ami sei kontinua no fo permisiu atu fo apoio ba Timor-Leste hodi kontinua dezenvolve hanesan nasaun ida,” dehan Catherine Elizabeth ba jornalista sira, Kinta (23/1/2025) iha Palasiu do Governo, Dili.

Membru Parlamentu Reinu Unido ne’e mos aforma katak Reinu Unido apoia Timor-Leste nia adezaun ba ASEAN, inklui iha direitus umanus nian.

Iha fatin hanesan, PM Xanana agradese ba vizita Catherine West nian mai Timor-Leste hodi tau Timor-Leste mos nu’udar parseria ida ba nasaun ida iha azia pasifiku nian.

“Ami koalia kona-ba ASEAN no sira apoio iha area oioin hodi ita bele mos tama iha ASEAN no ita koalia kona-ba politika internasional, tamba ita konhese UK (Reinu Unido, red) iha prinsipiu ne’ebe kapas ba estabilidade, ba konversaun ho rai hotu-hotu no nasoins hot-hotu,” hateten PM Xanana.