Vizita PR Horta ba Laos, Hametin Kooperasaun Ekonomia

DILI, www.news-viptv.com – Hafoin assiste adezaun Timor-Leste ba Organizasaun Mundial Komersiu (OMK) iha Abu Dhabi, EAU, Prezidenti Republika (PR) Jose Ramos Horta halo kedan vizita estadu ba Laos hodi hametin kooperasaun ekonomia entre rai rua refere.

Kooperasaun ekonomia ne’ebe Timor-Leste halo ho Laos maka iha area komersiu no industria ne’ebe asina hosi Ministru Negosiu Estranjeiru no Kooperasaun Bendito Freitas ho Vice Primeiru Ministru no Ministru Negosiu Estranjeiru Laos, Saleumxay Kommasith ne’ebe PR Horta ho Prezidente Laos Thongloun Sisouliht sai sasin ba asina akordu ne’e.

Iha inkontru bilateral, Prezidente Laos kongratula Timor-Leste nia adezaun ba OMK. Xefe Estadu Laos haktuir, ho Timor-Leste nia adezaun ne’e, ba oin bele iha kooperasaun ekonómiku ho Laos hodi fó benéfisiu ba povu no nasaun rua.

“Serbisu preparatóriu atu sai futuru hanesan ofisialmente simu nu’udar membru Organizasaun Mundiál Komérsiu nian loron rua liubá, ne’ebé ita-nia nasaun rua iha mekanizmu ida tenke uza atu fó benefisia, ha’u hein katak ita-nia adezaun ne’e bele kontribui liután ba promosaun komérsiu bo’ot liu ne’ebé korporasaun entre ita-nia nasaun rua,” hateten Prezidenti Thoungloung Sisouliht iha komunikadu ne’ebe redasaun assesu hosi Palasiu Prezidensial, 29 Fevereiru 2024.

Hafoin hasoru malu ho Prezidenti Laos, PR Horta ho delegasuan halo inkontru ho Primeiru Ministru Laos, Xonexay Siphandone hodi diskute kona-ba akoordu kooperasaun entre rai rua.

Iha okaziaun ne’e Embaxadór Timor-Leste asina mos nota entendementu ho Repúblika Laos atu troka Propriedade Rai.

Vizita Estadu ne’e, prezidente república halo mos vizita ba jardim dos erois no tau ai-funan ba iha monomentu erois Laos nian no halao mos vizita ba muzeum ‘That Luang Stupa’ Vientiane Laos.