USAID Apoia Miliaun $ 7.5 ba Programa Feto no Joven Kria Ita Nia Futuru

DILI, www.news-viptv.com – USAID Timor-Leste apoia tan osan miliaun $ 7.5 ba programa Feto no Joven Kria Ita Nia Futuru ne’ebe servisu hamutuk ho National Cooperative Business Asscociation CLUSA International no IOB Timor-Leste.

Apoia orsamentu refere fo liu hosi lansamentu programa Feto no Joven Kria Ita Nia Futuru ne’ebe lansa hosi Enkaregadu Negosiu Embaixada EUA, Marc Weinstock ho Sekretariu Estadu Formasaun Profesional no Empregu (SEFOPE) Rogerio Mendonça, iha Kampus IOB, Praia dos Coqueiro, Dili, Kuarta (22/11/2023).

Programa Feto no Joven Kria Ita Nia Futuru, ne’e sei apoia joven sira inklui feto no ema ho defisiente sira hetan kompetensia praktika sira neb’ee relevante ho merkadu traballu atu fo biban ba hetan servisu, involvimentu empreendedorizmu no kontribui ba properidade nasaun ne’e nian.

Orsamentu ne’ebe USAID apoia ne’e ba durasaun tinan lima (2023-2028) ba Sentru Servisu Juvenil iha Dili, Bobonaro no Baucau. Programa ne’e mos sei empodera Joven 22,000 husi grupu oi-oin liu hosi estabelesimentu Sentru ba Dezenvolvimentu Foin Sa’e iha Dili. Sentru ne’e sei oferese oportunidade ba dezenvolvimentu kompetensi ne’ebe dezena atu hatan ba nesesidade empreza lokal sira, organizasaun no instituisaun sira ne’ebe buka atu emprega traballador kualifikadu sira iha Timor Leste.

Orsamentu ne’e sei utiliza ba edukasional tempu badak Modalidade Empregu no Modelidade Empreendedorizmu. Programa Sira nee nakloke ba Joven no liu-liu ba Joven feto sira ne’ebe eskola no mos sira ne’ebe la eskola. Sentru ne’e mos sei promove oportunidade partisipasaun igual atu garante asesu, ekuidade no diversisade.

“Kompromisu Estadus Unidus no Governu Timor-Leste nian maka apoia Joven Timoroan Sira atu dezenvolve abilidade ne’ebe sira persiza atu harii sira nia future. Ida ne’e refleta iha kriasaun sentru Ida ne’e. Ami orgullu mai iha ne’e atu loke odamatan sentru ne’e nian iha Dili. Ami hakarak konvida joven motivu sira atu hariku imi nia aprendizajem no hetan liu tan kompetensia foun sira atu ajuda imi nia a’an, imi nia familia no Timor-Leste,” heteten Marc Weinstock.

Iha lansamentu ne’e, Sekretariu Estadu Rogerio Mendonça hateten katak, iha Timor-Leste problema bo’ot ida maka dezempregu. Ho kriasaun sentru ne’e bele ajuda mos rekursu humanus ne’ebe sei persiza iha kampu traballu.

“Iha kontuidu nebe maka Ita Nia Sentru ne’e iha no Hau hare iha pontu rua, Pontu ida maka prepara rekursu humanus ba merkadu traballu hanesan prepara mos ita nia empregadores hanesan kewirausahaan. Entaun prepara Ita nia Joven sira ne’e hotu-hotu ne’ebe maka remata sira nia estudu la signifika katak hotu-hotu tenke sai ba funsionariu publiku, maibe eduka Ita nia joven sira hodi bele partisipa iha negosio kiik sira ho nune’e kontenti tebes ho Sentru Dezenvolvimentu ne’ebe mak ohin Ita halo abertura,” dehan Rogerio Mendonça.

Ho sentru ne’e, sekretraiu estadu ne’e esplika, joven sira ne’ebe prepara atu servisu iha rai liur se mak iha nia kapasidade iha nivel edukasaun ne’ebe mak sei iha hela nivel kraik, entaun oinsa bele rekomenda fila fali balun ne’ebe mak iha hela sistema work Ready Pool bele mai tuir fila fali formasaun iha sentre ne’e.