Uniaun Europeia Parseiru Prinsipal ba Timor Leste

DILI, www.news-viptv.com – Governu Timor-Leste liu hosi Ministériu Negósius Estranjeirus no Kooperasaun konsidera Uniaun Europeia nu’udar parseiru principal ba Timor-Leste.

Ministro Negócio estrangeiros e Kooperasaun (MNEK), Bendito Freitas dos Santos iha Diálogu entre Uniaun Europeia ho Timor-Leste ne’ebe organiza hosi Diresaun Nasionál ba Komunikasaun Sosiál, no  Diresaun Nasionál ba Organizasaun Rejionál hateten, Timor Leste parseiru duni ho nasaun barak, maibe Uniaun Europeia mak parseiru ida ne’ebe prinsipal iha Timor Leste ne’ebe ho tinan naruk ona.

“Uniaun Europeia nia apoiu mai Timor Leste nee barak teb-tebes iha área saúde, ekonomia , Konstrusaun Estado, Infraestrutura, investimento Komersiu no mos área seluk tan ne’ebe ita presisa. Tamba Nee mak ohin presensa husi Uniaun Europeia nian ne’e marka mos ho testamunha firmeza tuir koperasaun Uniaun Europeia mai ita,” dehan Ministru Bendito Freitas ba jornalista sira iha Salaun MNEK Pantai Kelapa, Kinta (15/2/2024).

Iha fatin hanesan, reprezentante Manajer Diretora ba Asia Pasifiku iha Europeia External Servisu ba Asaun (EEAS), Paola Pampolonia senti orgullu tebes ho diálogo dahuluk períodu 2024 nian atu koalia no rona malu iha asuntu oioin hodi apoiu iha tempu tuir mai.

“Diálogo ne’e importante tebes entre nasaun rua ne’e hodi buka tuir tan área barak ne’ebe presiza halo koperasaun liu husi ekonomia, investimento komersiu, troka klimatika no iha area seluk ne’ebe interese nasaun nian,” dehan Paola.

Uniaun Europeia, deklara Paola, sei fo apoia mos ba Timor-Leste nia adezasaun hodi sai membru nasaun ASEAN.