TL ho Brasil Hametin Koperasaun iha Area Saude

LUANDA, www.news-viptv.com – Ministra Saúde dra. Odete Maria Freitas Belo realiza inkontru ho Ministru Saúde Brazil, Dr. Marcelo Antônio Cartaxo Queiroga Lopes hodi hametin koperasaun entre nasaun rua iha area saude.

Liu hosi komunikadu imprensa ne’ebe publika hosi Ministeriu Saude, ministru saude nain rua ne’e realiz ainkontru iha ambitu reuñiaun Estadu Membru CPLP nian ne’ebé realiza iha Luanda, Angola.

Iha inkontru ne’e, ministru saude na’in rua troka esperiensia servisu iha dezenvolvimentu sistema nasionál saúde, ko’alia mós kona-ba esperiénsia kombate pandemia COVID-19 no moras hada’et no mós moras la hada’et seluk ne’ebé dalabarak afeta saúde públika ohin loron nian.

“Durante enkontru ida-ne’e, parte rua diskuti oinsá haforsa kooperasaun iha ambitu dezenvolve área espesifikasaun iha saúde maka hanesan Haforsa servisu entomolojia iha Timor-Leste, Ministeriu Saúde Brazil oferese kursu Diplomasia da Saúde no área haforsa kapasidade profisionál saúde, no diskuti mós oinsá atu haforsa imunizasaun no hametin sistema farmasia iha Timor-Leste ba sistema ida mais sustentável,” hakerek komunikadu imprensa ne’e.

Nu’udar estadu membru ba CPLP, Ministério Saúde Brazil hatudu nia komitmentu atu kontinua fó apoiu hodi dezenvolve área saúde iha Timor-Leste.