Timoroan Ida Kona Vírus Zinko, Chikungunya 183

DILI, www.news-viptv.com – Ministério Saúde ho Organizasaun Mundial Saúde (OMS) iha Timor-Leste informa katak Timor-Leste hetan ona vírus foun ho naran Zinko ne’ebe ekipa vijilansia Saúde detekta husi feto ida ho tinan 7 hosi Munisipiu Ermera.

“Virus Zika (zinko, red) foin primeira vez Timor Leste afeta hafoin deskobre husi vijilansia saúde iha fulan janeiro ne’e afeta husi feto ida ho tinan 7 husi Munisipiu Ermera,” dehan Diretora Jeral Kuidadu Saúde primaria, Elisabeth Lelo Mão iha konferensia imprensa, Kuarta (24/1/2024), iha Palacio das Cinzas, Caicoli, Dili.

Maski Timor-Leste rejista ona Virus Zinko, MS husu publiku labele paniku tamba nasaun seluk afeta ona virus ne’e tempu naruk ona, maibe Timor-Leste foin primeira vez detekta vírus Zinko no seidauk relata kazu grave no mate.

“Ami hakarak sublinha ba publiku katak labele paniku, tinan-tinan waihira udan monu rai ita sempre hasoru surtu Dengue no tinan ida ne’e ita foin detekta tan surtu Chikungunya no Zika. Maibe moras rua ne’e kuaze atu hanesan ho Dengue tamba transmite liu husi susuk,” esplika Elisabeth.

Nia mos esklarese, moras Dengue, Chikungunya, no Zinko waihira akontese mak hamosu reasaun isin manas, moras iha artikulasaun, mosu mean iha kulit, isin moras, iha mos kazu balu mosu ho inus raan.

Dadauk ne’e MS detekta moras Dengue ho total kazu 88 ne’ebe afetado liu ho idade 1-15 no munisípio ne’ebe afetado liu mak Dili. Entertantu, moras Chikungunya total kazu 183 ne’ebe afetado liu ba idade media 22, munisípiu ne’ebe relata ba kazu Chikungunya mak Ermera ho Dili.

MS liu husi OMS husu publiku nafatin mantein saude ho tau lixu iha fatin hodi hadook susuk no mos waihira afeta ba sinais ne’ebe mensiona ona tenke hakbesik an ba sentru saúde sira.