Timor-Leste Selebra Loron Mundial Oseanu 2024

DILI, www.news-viptv.com – Mundu, inklui Timor-Leste ohin loron selebra Loron mundial oseanu 2024. Selebrasaun loron mundial oseanu iha Timor-Leste ne’ebe  hetan partisipasaun maximu husi lideransa nivel altu estadu sira ne’e hahu ho limpeza jeral ne’ebe lidera husi Primeiru Ministru Xanana Gusmão iha areia branka (rai-henek mutin) to’o iha tasi ibun Cristo Rei.

Hafoin atividade limpeza jeral, iha lokoraik kontinua ho lansamentu Peixe Azul (Ikan Azul) ne’ebe lansa husi Prezidenti Republika Jose Ramos Horta iha jardim tasi ibun Palacio do Governo.

Diretor Jeral Ambiente, Francisco Soares hateten, hahu lansamentu Ikan Azul, govenru apela ba komunidade hotu atu labele soe ona lixu plastiku arbiru no tenki soe iha duni lixu fatin ne’ebe iha.

Iha selebrasaun loron mundial oseanu ho tema mundial One Ocean, One climate, one future- Together ne’e, Primeiru Ministru Xanana Gusmão mos lansa livru kriansa ho titlu O meu Mar, O meu Timor iha Xanana Reading Center, Lecidere, Dili.

Livru ne’e rasik atu eduka labarik sira hahu hadomi tasi ho kuidadu ambiente tasi nian ne’ebe mos ho labele soe lixu arbiru.

Aproveita selebrasaun loron mundial oseanu ne’e Timor-Leste mos halo kampana nasional liga ho ekonomia azul ho tema “Ha’u-nia Tasi, Ha’u-nia Timor”.