Timor-Leste Kontinua Kooperasaun ho Cuba iha Area Desportu no Arte

DILI, www.news-viptv.com – Governu Timor-Leste liu hosi Ministeriu Juventude, Desportu, Arte no Kultura (MJDAK) afirma nia pozisaun hodi kontinua halo kooperasaun ho Governu Cuba iha area Desportu no Arte.

Ministru Juventude, Desportu, Arte no Kultura, Nelyo Isaac Sarmento hafoin simu Embaixadora Cuba ba Timor-Leste, Grisel Alina Aldama Inniss ho professor edukasaun fizika desportu Cubanu sira hateten, iha area desportu, Timor-Leste agradese ba Governu Cubano ne’ebe haruka ona nia professor espesialista sira iha area desportu hodi hanorin estudante UNTL sira ne’ebe gradua ona hosi sira nia estudu no bele sai futuru professor ba eskola sira.

“Prezensa professor espesialista sira ne’e ita sei presiza no sei kontinua,” dehan Nelyo Isaac Sarmento ba jornalista sira, Sexta (5/1/2024), iha Edifisiu MJDAK, Lecidere, Dili.

Tuir membru governu ne’e, prezensa professor espesialista Cubano sira ne’e hola papel importante mos iha planu promove desportu ba komunidade, hanesan atividade ne’ebe halo ona ho estudante sira iha fatin balun.

Iha inkontru refere, MJDAK mos husu ba Governu Cuba hodi bele ajuda prepara atleta nasional Timor-Leste ne’ebe sei compete iha SEA Games 2025 iha Thailandia.

Alende kontinuasaun area desportu liu hosi prezensa professor espesialista sira ne’e, kooperasaun seluk ne’ebe MJDAK sei kontinua maka ba area arte no kultura ne’ebe sei iha asina memorandum of understanding entre Governu Cuba ho Sekretaria Estadu Arte no Kultura.

Iha fatin hanesan Embaixadora Cuba, Grisel Alina Aldama Inniss hateten nia parte agradese ba Governu Timor-Leste, liliu ba MJDAK ne’ebe kontinua nia konfiansa ba professor espesialista desportu nian hodi bele kontinua hodi dezemvolve setor edukasaun desportiva nian hodi hanorin estudante UNTL sira.

“Primera Vez Timor-Leste halo nia istoria tamba bele gradua estudante iha edukasaun fizika desportu, no Cuba pronto atu kontinua nia apoia,” hateten Embaixadora Grisel Inniss.

Nia mos hateten, prezensa professor espesialista sira ne’e mos kontribui ba preparasaun atleta nasional balun ne’ebe nia rezultadu balun konsege hetan medalla iha nivel internasional.

Iha inkontru ne’e, embaixadora mos konvida ministru Nelyo Isaac Sarmento atu bele vizita Cuba iha 24 Abril to’o 2 Maiu 2024 iha Festival Juventude ida ne’ebe espesifiku ba joven voluntariu nian.