Timor-Leste iha ona Kazu Omicron 2

DILI, www.news-viptv.com – Hafoin nasaun 90 ne’ebe detekta ona nia sidadaun kona ba COVID-19 ho variante Omicron, Timor-Leste mos dadauk ne’e detekta ona iha kazu 2 ba variante Omicron.

Kazu 2 Omicron ne’e informa hosi Ministra Saude, dr. Odet Freitas Belo liu hosi video mensajem ne’ebe publika iha pajina Facebook Palacio das Sinzas, Kinta (3/2/2022) ho durasaun video minutu 4.11.

“Maluk doben sira, iha biban ida-ne’e, ha’u hakarak hato’o mensajen badak ida, la’ós de’it hanesan Ministra Saúde maibé hanesan mós sidadaun ida ne’ebé preokupa ho situasaun iha ita-nia rai laran. Pandemia sei la lakon iha mundu bainhira nasaun hotu-hotu seidauk bele hapara transmisaun COVID-19. Dadaun ne’e, variante Omicron da’et ona ba nasaun 90 iha semana 10 nia laran. Ita nia rai doben Timor-Leste mos, identifika ka rejista ona kazu konfirmadu Omicron rua (2),” informa Ministra Saude iha video refere.

Iha 1 Fevereiru, kazu COVID-19 sa’e makas fali ho numeru kazu 159 no kontiua aumenta iha 2 Fevereiru ho kazu 31 no total kazu 268.

“Maioria kazu ne’e la detekta Gen-S, signifika iha posisbilidade boot katak sira infetadu ho variante Omicron. Ida ne’e hanesan alarma ba ita atu kontinua kuidadu ita nia an hosi moras COVID-19

Infelismente hau observa ema barak mak lakohi ona halo tuir medida preventiva sira,” dehan dr. Odete Belo.

Hosi kazu ne’ebe akontese, nia esplika evidensia omicron bele daet lais, no bainhira iha kazu barak signifika katak ospitalizasaun bele aumenta bele fo presaun makas ba sistema saude.

“Ema bele mate tamba sira labele simu tratamentu apropriadu nebe sira presiza,” nia dehan.

Tamba ne’e, ema numeru ida iha ministeriu saude ne’e apela ba sidadaun hotu atu kontinua halo prevensaun ba moras COVID-19, liliu Omicron liu hosi dalan ba vasina kontra COVID-19 no halo tuir protokolu saude nian hodi kontinua halo distansia sosial, uza mascara no fase liman bebeik ho hand sanitizer ou sabaun.

Dadauk ne’e dadus ikus kona ba COVID-19, kazu ativu hamutuk iha 309, no total konfirmadu ba Timor-Leste maka 20.177, no obitu hamutuk 122.