Timor-Leste ho Indonesia Hahu Diskusaun Koperasaun Ekonomia Fronteira

DILI, www.news-viptv.com – Primeiru Ministru Taur Matan Ruak simu delegasaun hosi Governu Indonesia ne´ebe lidera hosi Governador Lemhanas, Andi Wijayanto hodi lori mensagem Prezidenti Joko Widodo kona ba koperasaun ekonomia iha área fronteira.

Ministru Presidensia Konsellu Ministru, Fidelis Magalhaes ba jornalista esplika katak inkontru ne´ebe halo entre governasaun rua neé nudar kontinuasaun diskusaun ne´ebe xefi estadu rua diskuti ona kona oinsa harii zona ekonomia esklusivu, inklui loke área komersiu livre iha fronteira.

Governador Lemhanas, Andi Wijayanto hateten, liu hosi koperasaun ne´e, Indonesia espera bele hasaé liu tan koperasaun ekonomia entre nasaun rua no bele lori prosperiedade entre povo nasaun rua iha área fronteira.

Alende hasoru malu ho Primeiru Ministru Taur Matan Ruak, Delegasaun Indonesia ne´ebe akompana mos Governador Nusa Tenggara Timur Viktor Laiskodat  no Embaixador Indonesia ba Timor-Leste Okto Dorinu Manik, delegasaun hasoru malu mos ho Prezidenti Republika Jose Ramos-Horta.