Timor-Leste Deklara Kandidatura Konsellu DH ba Periodu 2027-2029

Dili, www.news-viptv.com – Timor-Leste offisialmente liu hosi Ministra Negosiu Estranjeiru no Koperasaun, Adaljiza Magno deklara ona Timor-Leste nia kandidatura ba Konsellu Direitus Humanus (DH) ONU nian ba periode 2027-2029.

Maski antes ne´e, Presidente Republika Jose Ramos-Horta apoia ona Timor-Leste nia kandidatura ba Konsellu DH ONU ne´ebe governu Timor-Leste anunsia offisialmente iha 26 Jullu 2022, hafoin hetan aprovasaun liu hosi Konsellu Ministru iha 14 Abril 2021.

Razaun Timor-Leste adia nia kandidatura tamba hafoin ASEAN simu ona Timor-Leste nia adezaun nu´udar membru nasaun foun maski ho estatutu observador, ASEAN hili ona nia kandidatura uniku maka Indonesia ba Konsellu DH ONU nian ba periodu 2024-2027.

video deskursu bele loke iha ne´e: https://media.un.org/en/asset/k12/k12xev2zfv

Iha oportunidade ida ne´e, hau hakarak informa katak governu Timor-Leste desidi ona hodi adia nia kandidatura nu´udar Konsellu Direitur Humanus hosi periodu 2024-2026, ba periodu 2027-2029,” dehan Ministra Adaljiza Magno iha segementu nivel altu ba sesaun dala 52 Konsellu Direitus Humanus, Tersa (28/2/2023) iha Jenebra, Suiza.

Ministra Adaljiza esplika, kompleta ho riku esperensia hodi dezenvolve hikas nasaun ne´ebe uluk funu sai nasaun ne´ebe estavel no demokratiku ne´ebe promove realizasaun direitus humanus ba hotu, no hanoin ba esperensia ami nian nu´udar ilha kiik ne´ebe dezenvolve hela, Timor-Leste fiar ne´e bele lori persfektiva diferente ba konsellu.

“Wainhira eleitu, ne´e primeira vez Timor-Leste sai membru konsellu. Faktus ida ne´ebe sei haforte vizaun reprezentativu nian no diversidade membru ne´ebe forma konsellu. Timor-Leste espera hodi kontinua husu ita bo´ot sira nia apoia ba ami nia kandidatura,” dehan Ministra Adaljiza.

Nia afirma tan, “Timor-Leste mantein firmi nia komitmentu hodi kontinua servisu ho ita bo´ot sira ba objetivu komum hodi promove no proteje diretus humanus ba ema hotu.”