Timor-Leste Asumi Presidensia Uniaun Bombeiros CPLP

DILI, www.news-viptv.com – Timor-Leste iha 23 Setembru 2025 simu ona presidensia ba Uniaun Bombeiros Pais Lian Portugues (UBPLP) hafoin entrega husi Angola ne’ebe asumi antes ne’e.

Diretór Nasionál Servisu Bombeiru Timor-Leste, Anibal Paulo de Oliveira Maia hatete, Timor-Leste simu ona ai-sanak prezidénsia rotativa UBPLP nian hosi Angola ne’ebé simboliza la’ós de’it transferénsia lideransa, maibé mós unidade no amizade entre nasaun hotu-hotu.

Anibal Paulo de Oliveira Maia agradese bá Angola, bá servisu ne’ebé hala’o durante mandatu, ho dedikasaun no espíritu kooperasaun nian sei sai inspirasaun bá Timor-Leste.

“Timor-Leste asume prezidénsia ne’e hanesan kompromisu ida atu servisu ho haraik-an no determinasaun hodi hametin formasaun, fahe esperiénsia no kooperasaun entre nasaun hotu-hotu iha uniaun ida-ne’e,” dehan Anibal Maia ba jornalista sira hafoin hamutuk ho lideransa Bombeiros husi membru CPLP hasoru PM Xanana Gusmão, Sexta (26/9/2025), iha Palacio do Governo, Dili.

Nia hateten tan, “Ai-sanak ne’ebé Timor-Leste simu la’ós de’it símbolu ida. Ida-ne’e reprezenta aten-brani, sakrifísiu no solidariedade bá valór sira ne’ebé orienta bombeiru sira hotu durante assume  prezidénsia”.

Iha hasoru malu ho PM ne’e, Komandante Protesaun Sivíl no Servisu Bombeiru Angolanu (SPCB), Komissáriu Bombeiru Prinsipál Bravo Pereira Mendes, ofisialmente aprezenta maskota hosi UBPLP ba PM Xanana Gusmão.

Durante aprezentasaun, Bravo Pereira Mendes atualiza bá Primeiru-Ministru PM Xanana katak, prezidénsia rotativa UBPLP nian ofisialmente entrega ona bá Timor-Leste TL iha 23 Setembru 2025.

UBPLP ne’e estabelese iha tinan 2007 no sai hanesan plataforma ida hodi hametin kooperasaun entre Bombeiru sira CPLP nian, hodi promove interkámbiu institusionál no fahe benefísiu resíproka sira.

Bravo Pereira Mendes hateten, Enkontru ho Primeiru-Ministru Xanana Gusmão halo parte iha misaun ofisiál delegasaun Angolana nian iha ámbitu vizita hosi Uniaun Bombeiru sira País Lian Portugés nian, ne’ebé inklui vizita téknika sira bá estasaun bombeiru sira no troka esperiénsia ho autoridade timoroan sira.

Iha okaziaun ne’e mos Portugál fó onra bá Timor-Leste hodi entrega medalla ida bá Primeiru-Ministru, Kay Rala Xanana Gusmão nu’udár jestu hodi hatudu respeitu, amizade no fraternidade ne’ebé kesi metin povu sira.

Tuir planu, reuniaun Konsellu Komandante Protesaun Sivíl no Bombeiru CPLP nian bá dala-6 sei realiza iha Luanda iha fulan Outubru 2025.

Durante hasoru malu ho Primeiru-Ministru, delegasaun ne’e akompaña hosi Sekretáriu Estadu Protesaun Sivíl, Domingos Mariano Reis, Sekretariadu Permanente hosi UBPLP reprezenta hosi Vise-Prezidente Liga Bombeiru Portugés nian Delegasaun Angolana inklui reprezentante sira hosi SPCB no Embaixada Angolana iha Timor-Leste, Komisáriu Bombeiru João Bernardo Ambrósio.