DILI, www.news-viptv.com – Komunidade Suku foun 10 iha Timor-Leste, Sabadu (27/4/2024), ezerse sira nia deretu politika hodi hili sira nia xefi suku.
Suku foun 10 ne’e maka, Suku 5 iha Munisipiu Dili maka 3 iha Postu Administrativu Dom Aleixo, Suku Manleuana, Madohi, no Bebonuk. Entertantu iha Postu Administrativu Cristo Rei maka Suku Ailock, no iha Postu Administrativu Metinaro, maka Suku Mantelolão.
Suku rua seluk hosi Munisipiu Aileu maka Suku Lequitura iha Postu Administrativu Aileu Villa, no Suku Bocolelo iha Postu Administrativu Laulara.
Suku rua hosi Munisipiu Manatuto, maka Suku Sicone-Diloli iha Postu Administrativu Barique, no Suku Laicore iha Postu Administrativu Laclo.
Ikus ida maka iha Munisipiu Viqueque, Postu Administrativu Ossu, maka Suku Builo.
Hamutuk iha kandidatu xefi suku 42 (mane 39 no feto 2) ne’ebe konkore iha eleisaun lider komunitaria ne’e, Kandidatu xefi suku 42 ne’e maka Suku Bocolelo iha nain 2, Lequitura nain 5, Ailok nain 5 (feto 1), Bebonuk nain 6, Mahodi nain 9 (feto 1), Manleuana nain 4, Mantelolao nain 1, Laicore nian 3, Sicone-Diloli nain 2, Builo nain 5.
Sebastino Filipe Pereira nu’udar komunidade iha Aldeia 20 de Setembru, Suku Bebonuk, Postu Administrativu Dom Aleixo, Munisipiu Dili espera kandidatu sira ne’ebe eleitu tantu xefi aldeia no xefi suku tenki tau matan ba problema estrada, be’e mos no konflitu entre jovem sira liga ho grupu arte marsiais no arte rituais.
Maria de Fatima Soares da Cunha no Paulo Ximenes Dias nu’udar kandidatu ba xefi aldeia 20 de Setembru iha Suku Bebonuk hateten, hakarak kandidatu aan tamba hakarak kria dame iha nia bairo laran tamba durante ne’e sempre mosu konflitu entre membru arte marsiais no arte ritual sira.
Hamutuk bulletin votos 35,997 rihun tolunulu resin lima ,atus sia sianulu resin hitu maka Sekretariadu Tekniku Administrasaun Eleitoral produz ba votantes iha suku 10 ne’e.