Singapura Kontinua Oferese Formasaun Iha Administrasaun Públika

DILI, www.news-viptv.com  – Singapura dezenvolve hela programa espesífiku liu-liu formasaun bá Funsionáriu Públiku sira atu aprende oinsá bele hadi’a di’ak liu-tán Servisu Administrasaun Públika iha Timor-Leste (TL).

Embaixadór Naun-Rezidente Singapura nian iha Timor-Leste (TL), Robin Hu, atualiza asuntu ne’e bá Primeiru-Ministru (PM), Kay Rala Xanana Gusmão Kinta (14/08/2025) iha Palásiu Governu Dili.

Iha Komunikado Imprensa ne’ebe redasaun asesu, ba programa formasaun espesífiku ida-ne’e integra iha programa formasaun ne’ebé Singapura ho Timor-Leste estebelese ona desde tinan 2022 ho naran Programa Ekipa Singapura ka Programa Apoiu bá Prontidaun Aziátiku.

“Ha’u hasoru-malu ona ho Primeiru-Ministru, Xanana Gusmão iha fatin oioin ne’ebé sempre haksolok atu haree nia. Ha’u ko’alia ho Primeiru-Ministru kona-bá programa formasaun ne’ebé kontinua aumenta. Ami iha rekursu ida ne’ebé kompetitivu tebes. Ami dezenvolve hela programa formasaun espesífiku ida bá joven sira no mós formasaun bá funsionáriu sira oinsá bele hala’o di’ak liu-tán servisu iha Administrasaun Públika, ne’ebé ami sei inkorpora iha programa ne’e,” Robin Hu hateten hafoin enkontru.

Diplomata ne’e esplika, integrasaun programa formasaun bá joven no Funsionáriu Públiku sira iha Administrasaun Públika ne’e bazeia bá pedidu hosi Prezidente Repúblika (PR), José Ramos-Horta.

Dezenvolvimentu formasaun ne’ebé Singapura oferese bá Timor-Leste sai nu’udár programa parseria ida ho Institutu Sudeste Aziátiku nian.

Formasaun ne’e ho objetivu atu tulun funsionáriu sira komprende oinsá atu la’o, oinsá atu prepara-an hodi bele partisipa mós iha assembleia sira Sudeste Aziátiku nian.

Durante enkontru Primeiru-Ministru, Xanana Gusmão agradese bá Singapura ne’ebé bele fornese parseira di’ak-liu iha servisu polítiku hotu-hotu relasiona ho patrimóniu bá povu.

Primeiru-Ministru sente kontente ho atualizasaun espesífiku ida-ne’e no hein katak programa ida-ne’e susesu iha tinan 2025 bá oin.