Selebra Aniversariu CPLP, MNEK ho Prezidensia Republika Realiza Feira do Livru

DILI, www.news-viptv.com – Iha âmbitu selebrasaun aniversáriu ba dala-26 ezisténsia fundasaun CPLP nian, iha 17 Jullu ne’e, Timor-Leste liu husi Prezidénsia Repúblika no Ministériu Negósius Estranjeirus no Kooperasaun liu husi Diresaun Nasionál ba CPLP, mak hanesan prinsipál organizadores ba eventu refere.

Inisiativa Feira do Livru ne’e husi Prezidénsia Repúbika no konvida MNEK mós atu integra hanesan organizadór ba eventu selebrasaun aniversáriu CPLP nian iha dia 17 Jullu 2022.

Eventu refere hala’o iha resintu Prezidénsia Repúblika, hahu hosi loron 15-16 no remata iha loron 17 Jullu, no iha tempo hanesan Selebra mós loron aniversáriu CPLP nian.

Abertura Feira do Livru iha loron 15 jullu, 15h00 ne’e hetan partisipasaun husi S.E. Prezidente Repúblika rasik, S.E. Kay Rala Xanana Gusmão, Vice Ministru Negósius Estranjeirus no Kooperasaun, S.E. Julião da Silva, Embaixadas ne’ebé akredita iha Dili, estudantes sekundáriu lubuk ida husi eskola privadu no públiku, no instituisaun sira hanesan; Fundasaun Oriente, Plurál Editores, Timor Aid, Sala Leitura Xanana Gusmão, Care Internacional, Livru Kompania, Fakuldade Arte e Kultura UNTL, Mega Tour, g7+, Aiknanoik seluk tan.

Eventu ne’ebé hala’o durante loron tolu ne’e nakonu ho atividades aprezentasaun kulturais hanesan dansa, poezía, leitura, múzika no edukadores sira hodi anima labaraik sira ho konta istória oi-oin. Aprezentasaun Kulturais refere husi eskola públikas hanesan eskola CAFE Maliana, Manatuto no Aileu, eskola privada sira no eskola Portugéza Balide (EPD).

Feira do Livru ne’e inkluzívu partisipa mós husi defisiente matan sira ne’ebé organiza husi Abut. Ema atus ba atus mak visita Feira do Livru ne’e no hola livrus barak ho folin baratu atu motiva ema bele lê barak liután.

Enseramentu ne’e iha diskursu husi S.E. Vice-MNEK no S.E. Prezidente Repúblika, depois kontinua ho Cocktail no akompaña ho animasaun múzica husi Banda Kraken.