SEKOMS: Ofisial Media Laos Jornalista

DILI, www.news-viptv.com  – Sekretariu Estadu Komunikasaun Sosial (SECOMS), Expedito Dias Ximenes hateten media officer laos jornalista no labele halo servisu hanesan jornalista.

Sekretariu Estadu deklara assuntu ne’e wainhira halo inkontru hamutuk ho official media sira husi instituisaun governu nian, Tersa (29/07/2025) iha Edifisiu Sekretaria Estadu Igualidade Kaikoli, Dili.

“Jornalista ne’ebe halo kobertura atu bele hato’o iha publiku liuhusi meios komunikasaun sosial ne’ebe iha, dalabarak iha eventus barak, ne’ebe ke media oficer sira, halo knaar hanesan fali jornalista, iha impedimentu balun ke  jornalista sira labele halao sira knaar iha Kobertura, tamba media oficer sira taka hotu ho sira nia fotografia nomos sira nia asesu iha oin,” esplika Expedito Ximenes.

Iha inkontru refere, membru governu ne’e husu ba ofisial media sira atu hatene nia papel, liliu oinsa halo komunikadu imprensa relasiona ho servisu nia haknaar ba iha kada ministeriu.

Ho era digital no mudansa global, nia husu mos ba ofial media sira atu uza teknolojia tuir dezemvolvimentu teknolojia ne’ebe iha nune’e bele hafasil servisu iha dessiminasaun informasaun.

Nia mos esplika kona ba programa SEKOMS ne’ebe sei halo revisaun ba Lei Komunikasaun Sosial ba artigu balun ne’ebe la relevante ona nune’e labele hamosu konfuzaun iha implementasaun lei ne’e rasik.

“Iha tempu badak sei halao enkontru atu hare’e divizaun ida ne’e, no sei konvida media nain sira, akademiku sira, nomos organizasaun jornalista sira, atu fo hanoin molok atu lori ba Konselho Ministrus no hetan apresiasaun i depois sei enkamihna ba Parlamentu Nasional atu aprova no depois ba Prezidente Republika (PR) Jose Ramos-horta, atu bele promulga,” nia epslika.

Deonizia Tilman dos Reis nu’udar official media iha Sekretaria Estadu Eletrisidade hatete, inkontru refere importante no benefisiu ba nia nudar ofisial media atu bele komprende liu tan servisu ne’ebe nia halao no bele kopera diak ho media sira iha dessiminasaun informasaun.