SECOMS Rekomenda Jornalista Feto ba Kandidatu Foun Membru KI hosi PN

Dili (www.news-viptv.com) – Relasiona ona ho kargu atual ne’ebe nia asumi, Sekretariu Estadu Komunikasaun Sosial (SECOMS), Expedito Dias Ximenes rekomenda jornalista feto ne’ebe esperensia hodi troka nia pozisaun nu’udar membru Konsellu Imprensa ne’ebe reprezenta Parlamentu Nasional (PN).

“Ohin hau mai hasoru Prezidenti Parlamentu Nasional no iha ne’eba primeiru atu husu no bele aselera Substituisaun hau nian hanesan membru Konsellu Imprensa atu bele substitui fali kandidatu seluk atu bele kompleta,” informa Expedito Dias Ximens ba Jornalista, Kuarta, (16/08/2023), iha Edifisiu Parlamentu Nasional, hafoin hasoru malu ho Prezidenti PN, Maria Fernanda Lay.

Sekretariu estadu ne’e esplika, hamutuk iha membru Konsellu Imprensa nain 5, ne’ebe nain rua (2) hili liu hosi organizasaun jornalista sira, ida (1) hosi media nain sira, no rua (2) hosi Parlamentu Nasional.

“Rua (2) hosi Parlamentu Nasional ne’e, ida espererensia iha media no ida fali espererensia iha Legal. Ida husi espererensia media ne’e hau rasik no momentu ne’eba Parlamentu hili reprezentante Parlamentu iha Konsellu Imprensa. Tanba hau hetan knar seluk ona entaun presiza iha nia substituisaun tempurariu atu bele restu mandatu,” nia dehan.

Iha nia mandate, tuir Lei Komunikasaun Sosial no mos estatutu Konsellu Imprensa nian katak bainhira atu halo desizaun ida, tenki foti liu hosi plenaria no iha situasaun balun tenke iha prezensa membru nain lima ne’e.

“Agora ne’e membrus nain ha’at deit ne’ebe presiza substitui ida lalais hodi nune’e sira bele halo desizaun oinsa atu bele planu ba orsamentu 2024 no mos desizaun plenaria atu bele halo kontratou ba funsionariu sira,” esplika Expedito.

Iha nomeasaun membru foun, membru governu ne’e rekomenda bele nomeia jornalista feto ida ne’ebe iha esperensia.

Tuir informasaun, aprezentasaun kandidatu foun ba membru konsellu imprensa sei realiza depois Orsamentu Retifikativu 2023 nian.