Ran FRETILIN, Vota CNRT, Lospalos Hakarak Xanana ba Primeiru Ministru

LOSPALOS, www.news-viptv-com – Ran FRETILIN, Vota CNRT, ne´e maka spanduk ne´ebe hatudu hosi militante Partidu FRETILIN hosi Bairo Luturo Kuluhun Lospalos ne´ebe durante ne´e sai baze Partidu FRETILIN ba eleisaun parlamentar tinan ne´e desidi ona hodi fo sira nia votos ba Partidu CNRT ne´ebe lidera hosi Kay Rala Xanana Gusmão.

Reprezenta eleitor sira iha Bairo Luturo, Jose da Costa deklara sira hakarak fo votos ba Partidu CNRT tamba hakarak lori Xanana Gusmao asumi fali kargu Primeiru Ministru hodi ukun governu foun mai ne´e.

Nune´e mos eleitor sira hosi Luarai, Suku Bauro iha eleisaun parlamentar tinan ne´e hakarak hili Partidu CNRT tamba programa governasaun ne´ebe hatoo hosi Prezidenti CNRT, Xanana Gusmao.

CNRT iha nia komisiu ne´ebe halao iha Lospalos, Xanana Gusmao prontu fila hikas ba lidera Governu wainhira povu fo konfiansa ba CNRT hetan kadeira liu 33 iha Parlamentu Nasional.