banner 1000x250

Promove Rekonsiliasaun, Timor-Leste Realiza Festival Fronteira 2023  

  • Share
banner 728x90

MALIANA, www.news-viptv.com  – Atu hametin relasaun entre povu iha fronteira Timor-Leste no Indonesia no rekonsiliasaun entre Timoroan iha Timor-Leste no Timoroan iha Indonesia, Timor-Leste realiza eventu Festival Fronteira 2023 iha Maliana, Munisipiu Bobonaro hosi 15 to’o 19 Novembru 2023.

Festival Fronteira 2023 ho tema Interkambiu Kultura hametin rekonsiliasaun ne’e organiza hosi Ministeriu Juventude, Desportu, Arte no Kultura (MJDAK), Sekretaria Estadu Arte no Kultura (SEAK) ho Centro Nacional Chega, I.P !. Eventu refere ofisialmente loke hosi Ministru Juventude, Desportu, Arte no Kultura, Nelyo Isaac Sarmento.

Iha nia deskursu, Nelyo Isaac Sarmento hateten eventu ne’e importante tamba bele hametin liu tan ligasaun Timor leste ho Indonezia, li-liu iha fronteira entre Timor-Leste no Indonezia.

“Programa ne’e importante tebes mai ita hodi hametin ligasaun Timor Leste ho Indonezia li-liu ba ita sira ne’ebe hela iha Fronteira. Iha kalan (kuarta, red) ne’e Hau husu ba Posto Maliana sai uma nain ba Festival Fronteira hodi hametin ita nia rekonsiliasaun hanesan familia ida deit,” dehan Nelyo Isaac Sarmento iha Kampu Futebol Maliana, Kuarta (15/11/2023).

Governante ne’e mos husu ba joven sira hodi buka tuir istoria Timor Leste no Indonezia hodi sai memoria no bele dezevolve no hametin liu tan unidade entre Timor Leste ho Indonezia.

Diretor Executivu CNC.IP, Hugo Fernandes hateten atividade ne’e nu’udar implementasaun hosi rekomendasaun hosi Komisaun Amizade no Verdade, ne’ebe atu kontinua hametin relasaun Timoroan sira ho diferensia politika iha tempu pasadu.

Entertantu, Sekretariu Estadu Arte no Kultura, Jorge Cristovão lamenta ho dezisaun autoridade RAEOA ne’ebe la autoriza delegasaun RAEOA hodi partisipa iha eventu ne’e.

“Eventu ne’e importante ba povu iha lina fronteira, tamba ne’e lamenta mos ho dezisaun autoridade RAEOA ne’ebe la autoriza delegasaun mai partisipa,” dehan Jorge Cristovão iha nia deskursu.

Reprezenta delegasaun Indonesia, Administrador Belu Agustinus Taolin rekonese katak kulturalmente povu rai rua ne’e ida deit iha nia kultura.

“Ita ne’e mesak ida deit, hussar ida, Timor ida deit,” hateten Taolin.

Festival Fronteira 2023 ne’e hetan partisipasaun hosi delegasaun juventude no kultura hosi Malaka, Kefamenanu, Atambua no Kupang, entertantu hosi Timor-Leste reprezenta hosi delegasaun Covalima, Bobonaro no Dili.

  • Share

Leave a Reply

Your email address will not be published. Required fields are marked *

error: Content is protected !!