Promove Boxe, PacMan Sei Halo Investimentu Desportu iha Timor-Leste

Dili, www.news-viptv.com – Vensedor sintu boxe World Boxing Championship (WBC) klase bantam, Emmanuel Dapidran Pacquião alias PacMan hosi Filipina sei halo investimentu iha area desportu hodi promove boxe iha Timor-Leste.

Planu investementu ne’e PacMan koalia sai wainhira hasoru Prezidenti Republika, Jose Ramos Horta iha Palacio Presidensial Dili, Sexta (29/9/2023).

“Ha’u nia agradesimentu wain ba ita bo’ot sira, liu-liu média no funsionáriu hotu ne’ebé fó bemvindu ba ha’u ho di’ak tebes, ida ne’e mak ha’u nia vizita dala uluk mai Timor Leste, ha’u kontente no ami apresia imi nia atensaun no bemvindu, ha’u espera katak vizita ida ne’e la’ós ikus, tanba ha’u mós iha planu atu promove boxe iha Timor Leste no mós halo investimentu iha Timor Leste area desportu,” hateten PacMan ba jornalista sira hafoin hasoru mlau ho PR Horta.

Iha nia hasoru malu ho xefi estadu PacMan konta nia istoria ba nia kareira nu’udar boxista no mos hatoo nia komitmentu hodi dezemvolve diak liu tan modalidade boxe iha Timor-Leste.

“Ohin mós ha’u fahe uitoan ho Xefe Estadu kona-ba boxing tempu ohin loron, ha’u esplika kona-ba téknika boxing ne’ebé di’ak no saida mak ha’u bele kontribui ba dezenvolvimentu boxing iha Timor Leste,” dehan boxista mundial ne’ebe mos eis senador iha Filipina.

PR Horta informa katak estadu sei konvida hikas PacMan mai Timor-Leste hodi selebra hamutuk ho povu Timor-Leste iha komemorasaun loron restaurasaun independensia 20 Maiu 2024.

“Ha’u sei konvida senadór Many Paquião iha loron restaurasaun indepedénsia 20 Maiu tinan 2024 atu reprezenta povu Filipina iha selebrasaun ne’e no senadór bele motiva atu hamoris boxe foinsa’e iha Timor Leste hodi kontribui ba modalidade boxing nian,” dehan PR Horta.

Prezensa PacMan, esplika xefi estadu, laos deit sei anima jovem sira, liliu boxista Timoroan sira, maibe hametin liu tan relasaun bilateral entre Timor-Leste ho Filipina, espesialmente entre povu ho povu.

“Manny Pacquião nia naran koñesidu iha mundu no iha fatin-fatin no iha Timor Leste joven sira koñese, importante tebes Paquião nia vizita atu anima desportu boxe iha Timor Leste, en-espesifiku ba joven barak ne’ebé boxing. Segunda atu promove desportu enjerál, ba datoluk ninian hametin liu tan relasaun bilaterál entre povu ba povu Filipina no Timor Leste ne’ebé iha relasaun antigu ona no kleur tebes ona, iha ne’ebé povu Filipina sempre apoiu Timor Leste no Timoroan lubuk ida uluk ba estuda iha Filipina,” hatete PR Horta.

Iha relasaun bilateral, Novembru 2023, xefi estadu sei halo vizita estadu ba Filipina hodi koalia koperasaun entre nasaun rua.

Iha fatin ketak, Primeiru Ministru (PM) Xanana Gusmão agradese ba vizita PacMan mai Timor-Leste tamba bele motiva liu tan jovem boxista sira iha area desportu.

“Agradese tebes bai ta nia vizita mai Timor-Leste, ida nee importante tebes atu fo apoiu no motivasaun baa mi nia juventude sira iha desportu boxing,” dehan PM Xanana.

PacMan vizita Timor-Leste hodi hatan konvite hosi Ministru Juventude, Desportu, Arte no Kultura, Nelyo Isaac Sarmento ne’e halo ona kontaktu tinan barak hodi oinsa boxista legendariu ne’e bele vizita Timor-Leste hodi motiva jovem sira iha modalidade desportu.

Manny Pacquiao ho naran kompleitu Emmanuel Dapidran Pacquiao. Pac Man, moris iha Kibawe, Filipina, loron 17 Dezembru 1978.

Nia hahú ninia kareira nu’udar boxe mundiál klase welter iha loron 22 Janeiru 1995 hasoru Boxe Edmund Enting Ignacio no halakon boxista mundiál lubuk ida hodi halo nia sai famojo too agora.

Iha fatin hanesan, Boxista Legendariu Filipina, Manny Pacquiao agradese tebes bele hasoru Xefe Governu Xanana hodi deskute kooperasaun servisu iha área desportu boxing nian.