PR Ramos-Horta: Xanana mak Re-Organiza FRETILIN no FALINTIL hafoin 7 Dezembru 1975

Dili, www.news-viptv.com – Prezidenti Republika (PR) Jose Ramos-Horta hateten, Kay Rala Xanana Gusmão atual Primeiro-Ministru maka ema ida ne’ebe uluk hafoin invasaun Indonesia iha 7 Dezembru 1975 maka organiza hikas Frente Revolucionario Timor-Leste Independente (FRETILIN) no Forsa Armada Libertasaun Nacional Timor-Leste (FALINTIL).

“Wainhira baze de apoio monu FRETILIN mohu, FALINTIL mohu ema ida mosu ne’e Xanana Gusmão, nia mak organiza fila fali FALINTIL, organiza fali Komite Sentral FRETILIN lori povo sae to’o Monte Sinai (Foho Matebian),” dehan PR Ramos-Horta iha nia mensajem ba loron 7 Dezembru 2023.

Xefi estadu esklarese, 7 Dezembru 1975 mosu hafoin Timor-Leste deklara unilateralmente independensia iha 28 Novembru 1975 ne’ebe proklama hosi Fancisco Xavier do Amaral nudar Prezidenti FRETILIN no mos Prezidenti Republika hamutuk ho saudozu Nicolau Lobato nudar Vise Prezidenti.

“Sira nain rua maka fundador RDTL. Sira nain rua fo sira nia vida, Nicolau Lobato fo nia vida durante tempu luta,” dehan xefi estadu.

Hafoin invasaun militar Indonesia, Timor-oan rihun ba rihun maka mate durante funu nia laran, laos deit inimigu maka oho, maibe Timor-oan ho Timor-oan maka oho malu.

“Ba sira hotu-hotu ne’ebe mate iha tempu funu mate iha kombate Hau nia hakruk ba sira maibe sira ne’ebe mate ho FRETILIN nia leet ho FRETILIN nia kilat tanba divizaun internu iha neba mak labele haluha sira. Kamarada rasik, militar rasik FALINTIL oho malu, divizaun sira ne’e labele haluhan sira, labele haluha elementus sira APODETI ne’ebe mak mate, labele haluha elementus sira UDT ne’ebe mos mate hetan funjiramentu iha 1975,” dehan PR Ramos-Horta.

Nia mos konta katak iha 4 Dezembru 1975 nia hetan ordem hosi Nicolau Lobato hodi ba Nova Iorke (Estadu Unidos Amerika) hodi hato’o Timor-Leste nia kauza (independensia) iha Nasoens Unidas.

“Sira seluk hela iha rai laran, sira mak heroi duni,” deklara xefi estadu.

Iha 7 Dezembru 2023, xefi estadu husu nafatin ba Timor-oan sira atu reza ba sakrifisiu heroi sira ne’ebe lakon ona vida atu bele fo inspirasaun ba futuru Timor-Leste ne’ebe diak.

“Hahu kedas ho Nicolau Lobato, FALINTIL sira hotu sira nebe lakon sira nia vida i mos sira ne’ebe ho Maromak nia tulun sei moris too ohin ba sira hotu-hotu ita halo Omenazen ba sira. Ba ex prizoneiro sira, ba redi Klandestina sira tanba ne’e maka ohin Hau bele halo mensajen ida ne’e 7 Dezembru 2023 iha tempu Timor Leste livre indepedente, hakuak boot ba povo tomak iha rai laran no mos iha rai liur,” hatete PR Ramos-Horta.