PR Ramos-Horta Konfirma Papa Francisco Sei Vizita Timor-Leste

Dili, www.news-viptv.com – Prezidente Repúblika (PR), José Ramos-Horta iha nia inkontru offisiál dahuluk ho Papa Francisco konfirma katak lideransa Katolika mundial ne’e sei vizita Timor-Leste.

‘’Nia (Amu Papa) kontente ho Timor Leste. Nia hadomi no akompaña situasaun no konfirma hakarak vizita Timor-Leste,’’ dehan PR Ramos-Horta hafoin hasoru malu ho Papa Francisco, iha Basílica Santa Marta, Vatikanu, Segunda (22/01/2024), tuir komunikadu imprensa ne’ebe VIP TV assesu.

Kona-bá vizita Papa Francisco, xefi estadu esplika, markasaun data sei anúnsia ofisialmente hosi Igreja Katólika Timor-Leste hamutuk ho Santa Sé. Hodi realiza vizita Papa Francisco ba Timor-Leste, delegasaun hosi Vatikanu iha fim Janieiru ne’e sei to’o iha Dili hodi estuda mekanízmu sira liu-liu estuda lojistika no infraestutura ba vizita Sua Santidade nian.

Lider rua ne’e mos diskute kona-bá situasaun mundiál inklui situasaun Myanmar ne’ebe Papa Francisco mos preokupadu tebes liga ho umanitária no militár ne’ebé la konsege manan funu ne’e.

Mediasaun maka solusaun ba situasaun sira hotu, mediasaun liuhosi negosiasaun atu labele hamosu tan guerra sivíl ida ne’ebé pior, hanesan mós iha Gaza no Ukránia. Ko’alia mós iha enkontru ne’e kestaun dívida mundiál ba nasaun sub-dezenvolvidu sira inklui problema kiak iha mundu.

‘’Amu Papa apresia mós kona-ba relasaun entre igreja ho estadu ne’ebé la’o ho independente no la interfere malu, maibé kolabora institusionalmente nu’udár Timor-oan. Hanesan Xefe Estadu sempre orgullu lori Timor ba mundu maske rai ne’e ki’ik maibé mundu koñese no nasaun barak konsidera,’’ dehan PR Ramos-Horta.

Prezidente Horta haklean, Amu Papa sempre akompaña aten-brani povu Timor nia luta ba independénsia, hatene mós sakrífisiu sira hotu inklui admirasaun ba Timor-Leste nia rekonsilisaun ho Indonézia ne’ebé lais liu tambá konsidera hanesan rekonsilisaun úniku iha mundu maske iha funu-naruk nia laran.

Nune’e, Xefe Estadu esplika katak rekonsiliasaun ne’ebé akontese tanbá lideransa Kay Rala Xanana Gusmão, ne’ebé dada ba luta no dada ba rekonsiliasaun.

Atu hakotu, Prezidente Republika husu ba povu tomak atu ‘’reza ba Amu Papa nia saúde’’, nune’e bele vizita Timor-Leste iha fulan-klaran tinan ne’e nian.

Remata enkontru ho Papa Francisco I, Prezidente Horta ho delegasaun kontinua enkontru ho Primeiru-Ministru Vaticano, Cardeál Pietro Parolin no Seretáriu Estadu Assuntu Relasaun Internasionál Vaticano, Archebispo Paul Richard Gallagher, hodi haklean diskusaun ba planu vizita Amu Papa nian iha tinan ne’e.

Iha vizita offisiál ne’e, Xefe Estadu akompaña hosi, Ministru Negósiu Estranjeiru, Bendito Freitas, Embaixadora Timor-Leste ba Santa Sé, Cheloé Tilman Dindo, Xefe Casa Civíl Prezidénsia Repúblika, Jesuína Maria Ferreira Gomes, Assesór Relasaun Internasionál Prezidénsia Repúblika, Nelson dos Santos no sira seluk tan.