PR Ramos-Horta husu Governu Tau atensaun ba Trafiku Umanu no Droga

Dili, www.news-viptv.com – Prezidente Repúblika, Jose Ramos-Horta iha reuniaun Primeiru Konsellu Superior Defeza no Seguransa (KSDS) husu ba governu atu tau atensaun ba Trafiku Umanu no Droga.

“Imi jornalista sira mak hatene karik dehan ema iha ne’eba ne’e konsumu droga no faan droga iha ne’e ka iha ne’eba fó hatene ba polísia no ministériu sira kompetente atu la’ós ba kaer baku soe hela maibé lori mai atu rezolve tiha kazu sira ne’e,” dehan Primeiru Ministru Kay Rala Xanana Gusmão ba jornalista sira hafoin inkontru, Kinta (8/2/2024), iha Palasiu Presidensial, Dili.

Alende ne’e, husu mos ba governu nu’udar orgaun ezekutiva ne’ebe responsabiliza ba area defeza no seguransa hare mos asuntu krimi organizadu no money laundry.

Iha inkontru ne’e, xefi estadu fo apresiasaun bo’ot ida ba joven sira hotu no responsavel grupu arte marsiais no arte rituál sira hotu ne’ebé depois hasai tiha desizaun suspende sira nia atividade komesa diminui no PR Ramos-Horta fo apresiasaun bo’ot tebes bainhira ita selebra iha tempu natál nian, to’o anu novu remata no ikus fali mai mós la akontese buat ida.

“PR Ramos-Horta apela katak, joven sira, ita bele fiar katak ho joven sira nia partisipasaun ne’ebé ho konsiénsia tebes ita bele hanoin daudauk ona oin nusa mak ita bele hadia rai ida ne’e,” dehan PM Xanana.

Asuntu importante ne’ebe koalia mos iha inkontru KNDS kona ba seguransa ba vizita Amu Papa Francisco mai Timor-Leste.

“Ikus liu ko’alia kona-ba ita nia preparasaun atu simu Papa Francisco, ne’ebé hanesan ita hatene iha komisaun ida ne’ebé mai husi Vatikanu ko’alia mós ho komisaun ne’ebé governu forma iha Timor no komisaun rua ne’e hala’o daudauk servisu balun no Papa Francisco sei mai iha Fulan Agostus, hanoin katak ita Iha tempu naruk atu halo buat hotu ne’ebé komisaun dehan tenke halo ida ne’e no halo ida ne’eba liu-liu tanba Papa Francisco idade ona,” dehan PM Xanana.

Iha ajenda vizita Papa Francisco, lideransa mundial Katoliku ne’e sei hahu vizita ba Papua New-Guine, Timor Leste, Singapura, no Jakarta (Indonesia).

“Prezidenti Republika husu ba governu no husu ba membru KSDS atu buka koordena ba malu hodi prepara daudaun kondisaun sira liu-liu seguransa nian. Tanba Iha Maiu komisaun husi Vatikanu sei mai tan, mai atu haree, ita halo ona saida relasiona ho Papa nia vizita mai Timor Leste,” esplika xefi governu ne’e.