PR Ramos-Horta Entrega Premiu Direitus Umanus Sergio Vieira de Mello ba Manan Nain 5

Dili, www.news-viptv.com – Prezidente (PR), Jose Ramos-Horta, intrega Prémiu Direitus Umanus Sergio Vieira de Mello Edisaun 17 ba vensedor distintu na’in lima, iha Palásiu Prezidensiál Nicolau Lobato, Terca (10/12/2024). 

Prémiu Direitus Umanus Sérgio Vieira de Mello nu’udar inisiativa ne’ebé lansa iha tinan 2008 hosi Prezidente Repúblika (PR), Jose Ramos-Horta, ho objetivu atu rekoñese kontribuisaun hosi sidadaun timoroan, sidadaun estranjeiru, organizasaun governamentál ka naun-governamentál sira, ba prosesu promosaun, protesaun no defeza direitus umanus iha Timor-Leste.

Prémiu sira ne’e fó iha kategoria rua ne’ebé diferente, maka: Iha Direitu Sivíl no Polítiku, ne’ebé fó ba indivíduu no organizasaun sira ne’ebé fó kontribuisaun notável ba promosaun no protesaun direitu sivíl no polítiku sira iha nasaun. Iha Direitu Ekonómiku, Sosiál no Kulturál, atribui ba sira ne’ebé maka fó ona kontribuisaun signifikativu ba promosaun no defeza Direitu Ekonómiku, Sosiál no Kulturál.

Vensedor sira ba tinan ida ne’e iha kategoria Direitu Ekonómiku, Sosiál no Kulturál, hamutuk iha ema nain 5 mak hanesan, 1. Viquiano Gama da Costa, 2. Sentru Dezenvolvimentu Inkluzivu, 3. Padre Augusto Hermenegildo Nunes, OFM, Conv, 4. Hipólito Alves dos Santos 5. Ezequiel Fernandes de Oliveira.

Prezidente Ramos-Horta hateten, Sira nia dedikasaun hodi promove no proteje direitu sivíl no polítiku sira reprezenta duni espíritu husi prémiu ida-ne’e no legadu Sergio Vieira de Mella nian.

Bazea ba Dekretu-Lei No. 15/2009 loron 18 fulan-Marsu, vensedor ida-idak simu sertifikadu no prémiu osan hamutuk US$10,000.

Tuir Hipolitu Alves dos Santos, hanesan Premiadu ba manan nain ho kategoria Direitu Ekonómia, Sosial no Kultura hatete, Hanesan premiadu senti kontenti ho preimiu ida ne’e sei koragem nafatin sira atu bele motiva diak liu tan no liu-liu luta ba Direitus Humanus no kresimentu Ekonomia sai problema boot iha Ita nia rai.