Povu Timor-Leste Vota ba Lider Komunitaria

Dili, www.news-viptv.com – Povu Timor-Leste ohin (28 Outubru) jeralmente ezerse sira nia deretu votos ba lider komunitaria iha fatin sira hela ba.

Hamutuk iha suku 452, maibe suku 442 iha Timor-Leste tomak maka realiza eleisaun ba lider komunitaria hodi hili sira nia xefi suku, xefi aldeia no konsellu suku. Entertantu suku 10 nu’udar suku foun sedauk bele realiza eleisaun. Suku fon 10 ne’e maka Munisipiu Dili iha suku foun 5, Aileu suku foun-2, Manatutu suku foun- 2, Viqueque- Ossu suku foun -1.

Iha Aldeia Fuslam, Suku Bairo Pite, Postu Administrativu Dom Aleixo, Munisipiu Dili ho antuazismu ba sentru votasaun tamba iha suku refere, kandidatu xefi suku iha nia feto nain rua hosi Aldeia Fuslam maka kandidata an maka Alzira da Conceição Martins no Joaninha Alves Soares (atual xefi aldeia Fuslam).

Alzira no Joaninha compete ho mane nain 3 seluk maka xefi suku atual, João Baptista da Costa Belo, Marcelio L. Max da Silva Chatulessy no Cipriano de Jesus dos Santos.

Iha suku Bairo Pite hamutuk iha aldeia 26 ho nia total votantes 21.000 no ba aldeia Fuslam hamutuk total votantes 663.

“Se wainhira komunidade fo fiar hau ba iha eleitu duni ba sefi du suku Bairo-Pite nian hau sei la promesa ba povu maibe hau hakarak serbisu hamutuk ho komunidade, saida mak aldea no suku laran sedauk atinji ita hotu-hotu hamutuk para dezenvolve ba iha suku Bairo-Pite,” dehan Aljira ba VIP TV, Sabadu (28/10/2023), iha Sentru Votasaun Aldeia Fuslam, Kakaulidun, Dili.

Entertantu kandidata Joaninha Soares Alves hateten, nia avansa hodi kandidata an tamba ho esperensia nia nu’udar xefi aldeia nia bele hatene ona saida maka xefi suku tenki halo iha aldeia sira.

“Kuandu hau eleita mak hau nia mandatu ne’e remata mos, hau nia funsaun no knar ne’e mak asina deit hare deit no rona deit, mais hau la iha ideas no inovativa ida katak hau tenke hanoin duni katak sei hau kandidata hau tenke halo mudansa ba iha Suku Bairo-Pite ida nee,” dehan Joaninha.

Primeiru-Ministru Kay Rala Xanana Gusmão husu ba povu Timor-Leste atu partisipa hodi hili kandidatu xefe suku ne’ebé sira fiar ba ukun tenki hakbesik aan ba povu hodi rezolve povu nia problema no kria paz ba povu hotu hosi aldeia no suku hotu- hotu.

“Hau mai nu’udar populasaun Aldeia Lacoto, hau nia espetativa katak ita hein xefe aldeia, xefi suku no delegadu servisu hare ba povu nia situasaun, liliu kona ba seguransa, ema labele baku malu, labele tama arbiru arte marsial, tamba arte ne’e labele oho malu, tamba ne’e iha lacoto sira promete katak buat ne’e la tama atu estraga fali jovem sira, tamba iha governu iha programa tinan lima nia laran atu desentraliza mai too kada suku, aldeia bele iha ona posibilidade boot liu atu hatoo nesesidade povu nian iha administrasaun,” dehan PM Xanana ba jornalista sira hafoin ezerse nia deretu votos iha Aldeia Lacoto, Balibar.