PNTL: Hoax, Laiha Estudante manifestante Mate

𝐃𝐈𝐋𝐈, www.news-viptv.com – Polisia Nasional Timor-Leste (PNTL) deklara iha manifestasaun loron daruak laiha estudante ida ne’ebe mate no informasaun ne’ebe espailla iha media sosial konsidera hoax ou falsu.

Deklarasaun PNTL ne’e publika liu husi pajina official PNTL iha Facebook ne’ebe publika minutu 33 liu ba.

“Diresaun servisu Investigasaun Kriminal iha Polisia Nasional Timor-Leste (PNTL) halo ona komfirmasaun ba Hospital Nasional Guidu Valaderes (HNGV), foto sidadaun ida viral iha rede social Facebook no Watshaap mate ne’e kazu asidente trafégu iha Munisipiu Ermera iha loron 15/09/2025, Laos estudante Manifestante sira mak mate ne’e informasaun Falsu no Hoax,” klarifika PNTL iha nia publikasaun.

Estudante universitariu sira kontinua halo manifestasaun kontra dezisaun Parlamentu Nasional ne’ebe atu hola kareta ba deputadu nain 65.

Kareta Governu nian ida ne’ebe hetan sunu husi oknum manifestante balun. Photo: Media Sosial

Iha loron daruak PNTL kontinua halo atuasaun makas hodi kontinua tiru gás lakrimojéniu ba estudante sira ne’ebe hahu sunu roda no sobu barikade ne’ebe PNTL monta iha Estrada Muzeu resistensia nia oin.

Laos ne’e deit, kareta governu ida ho koor metan ho xapa matrikula 06-903 hetan sunu iha area Kampu Tenis Liceu iha Fakuldade Ekonomia UNTL nian.

Estudante UNPAZ wainhira simu orientasaun husi Reitór Interinu, atual Vise Reitor Asuntu Akadémiku, Joaninho Xavier Hei ne’ebe fo ordem ba nia estudante atu la tuun iha manifestasuan loron 16-17 Setembru 2025 tamba ejijensia manifestante sira nian simu ona husi Partidu 3 iha PN hodi kansela sosa kareta ba deputadu sira. Photo: UNPAZ Media Center.

Iha loron daruak ne’e UNPAZ avizu ona ba nia estudante sei la tuun ba manifestasaun ba loron 16 no 17 Setembru 2025 hodi hein progressu husi ejijensia ne’ebe estudante sira hato’o katak hapara sosa kareta ba deputadu sira.

“Desizaun husi Magnífiku Reitór deside ona katak durante loron rua husi, loron 16-17 fulan setenbru tinan 2025, Universidade da Paz ho estudante sira la Partisipa ona demostrasaun Tanba hein rejultadu progresu husi membru parlamentu sira kansela duni ka lae, karik sira laiha asaun ka sira-nia promesa ne’e, UNPAZ sei tun fali halo demostrasaun fali kontra Parlamentu nasional,” dehan reitór Interinu, atual Vise Reitor Asuntu Akadémiku, Joaninho Xavier Hei, Lic. CSH.M.Ed.Ph.D, tuir publikasaun iha UNPAZ Media Center, Tersa (16/9/2025)

Entertantu aban loron 17 fulan setembru tinan 2025, ensinu aprendizajen Universidade da Paz sei la’ó normal ka hanesan bain-bain.