PM Taur informa ona Lisensa ba PR hodi Apoia Lu-Olo iha Kampana

DILI, www.news-viptv.com – Primeiru Ministru (PM) Taur Matan Ruak offisialmente informa ona nia lisensa ba Prezidente Repúblika (PR) Francisco Guterres Lú Olo, atu tuir kampaña eleisaun ba Prezidente Repúblika.

Primeiru Ministru sei husu lisensa no tuir kampaña hodi fo apoia kandidatu Prezidente Repúblika Francisco Guterres Lú Olo iha munisípiu sira, husi husi 2-16 abril 2022. Xefe Governu sei fila hikas fali ba servisu hafoin loron votasaun iha 21 abril 2022.

“Ha’u hateten ba Prezidente katak Ha’u lisensa atu partisipa iha kampaña,” dehan PM Taur iha komunikadu imprensa ne’ebe publika hosi Gabinete Media Presidenti Republika, Kinta (31/3/2022).

Primeiru Ministru hateten katak Governu simu karta husi Igreja Katólika husu atu muda loron kampaña ne’ebé sei hala’o iha santa paskua ninian. Governu deside la halo mudansa maibé kandidatu ida-idak mak sei tuir regras ne’ebé iha.

“Orsida kandidatu ida-idak, hanesan katóliku, respeita de’it regras. Tanba muda ne’e labele. Más konserteza katak to’o 14-15 (abril) ema hotu-hotu la halo kampaña, ha’u rasik ba kampaña más loron rua ne’e, ha’u sei la halo. Ha’u sei deskansa,” dehan PM Taur

Iha audiénsia ne’e, Primeiru Ministru informa mós kona-ba seguransa no partisipasaun sidadaun ninian ba eleisaun segunda volta ninian.

Ohin, Primeiru Ministru partisipa iha serimónia tomada posse husi Prezidente Repúblika ba membru Governu na’in-rua, Sekretáriu Estadu ba Terras no Propriedade Eldino Rodrigues dos Santos no Sekretária Estadu ba Igualdade no Inkluzaun Maria do Rosario Fátima Correia hodi substitui Sekretáriu Estadu ba Terras no Propriedade Mario Ximenes no Sekretária Estadu ba Igualdade no Inkluzaun Maria José da Fonseca Monteiro de Jesus.

Ba Primeiru Ministru, substituisaun ba membru Governu nu’udar buat normal ne’ebé akontese iha ne’ebé de’it, la’ós kazu espesífiku Timor-Leste ninian.

“Troka (membru) governu ne’e normal iha fatin-fatin. Ha’u uluk Primeiru Ministru, sala laiha, ema hakarak hatun tiha ha’u,” Taur Matan Ruak hateten.

Eleisaun primeira volta ne’ebé kandidatu na’in-16 kompeta ba malu laiha ema ida mak manán ho porsentajen 50 +1. Iha kandidatu rua mak mais votadu no sei konkore ba eleisaun segunda volta iha 19 abril 2022.