Pasiente Sedauk Transfere ba Rai Liur, Elia: Problema iha Dokumentu Pasiente

DILI, www.news-viptv.com – Ministra Saude, Dra. Elia Amaral hateten pasiente sira ne’ebe sei transfere ba rai liur sedauk bele transfere tamba pasiente barak maka sei hasoru problema iha dokumentu viagem nian.

Ministra Saude informa kestaun ne’e hafoin fo esplikasaun ba Komisaun F Parlamentu Nasional (PN) relasiona ona ho prosesu transfere pasiente ba estranjeiru.

“Pasiente ne’ebe sei transfere ba halo tratamentu iha Rai Liur sei iha hela prosesu nia laran tamba pasiente barak maka sei failha hela ho dokumentus,” dehan ministra ba jornalista, Kuarta (2/8/2023).

Iha fatin hanesan, Presidente Komisaun F ne’ebe hare assuntu Saude, Seguransa Sosial no Igualidade jeneru, Maria Gorumali Barreto esklarese hamutuk iha pasiente 50, ne’ebe hosi numeru ne’e nain 10 veteranu.

“Pasiente sir aba rai liur ne’e moras riins, kankru, no fase ran,” hateten Maria Barreto.

Kona ba kestaun dokumentu, Komisaun F sujere ba Ministra Saude atu kolabora ho Ministeriu Justisa no Ministeriu Negosiu Estranjeiru hodi oinsa bele prepara lalais pasiente sira nia passaporte.

Alende koalia assuntu tranfere pasiente ba rai liur, koalia mos kona ba ai-moruk iha sentru saude no fasilidade hodi atende pasiente sira.