Parlamentu Nasionál Aprova Lei Protokolu Estadu

DILI, www.news-vipt.com – Parlamentu Nasionál liu husi reuniaun plenária ordinária, ho prezensa Ministru Negosiu Estranjeiru no Kooperasaun (MNEK), Bendito dos Santos Freitas, aprova ona iha final global ba Projetu Lei Nu. 7/VI (1a) – kona-ba Presedensia no Protokolu Estadu nian, Tersa (11/6/2024).

Lei Presendensia no Protokolu Estadu ne’ebe aprova ho 59 votu a favor, 0 kontra no 0 abstensaun ne’e atu guia no fasilita orgaun Estadu sira iha atividade ka serimonia ofisial sira liga ba entidade sira estadu nian ho nia pratika tuir lei.

Prezidenti Komisaun B, Domingos Augusto “Deker” antes aprovasaun, esplika katak nu’udar nasaun, Timor-Leste persiza duni Lei kona-ba Presedensia no Protokolu Estadu hodi dignifika no valoriza instituisaun estadu sira no mos entidade sira tuir ida-idak nian estatutu.

“Atu konsiente katak hanesan nasaun ida estadu soberanu ida ho independensia 20 ital anus kuaze hanesan luta ba libertasuan patria nia tempu to’o ohin loron persiza hatene ita sedauk iha lei protokul estadu, sai preokupasaun bo’ot ita hotu nian, liliu komisaun B, lei ne’e importante ba nasaun Timor-Leste, ho lei ne’e duni maka ita atu dignifika no valoriza instituisaun estadu ida ba ida seluk, entidades sira husi leten to’o iha baze, atu ida-idak iha nia fatin tuir nivel ne’ebe iha no dignu, estadu iha dever moral atu halo tratamentu ba entidade hotu tuir nivel real ne’ebe iha,” dehan Deker.

Deputadu KHUNTO, Antonio Verdial de Sousa hateten, inprinsipiu Bankada KHUNTO fo parabens ba servisu Komisaun B ne’ebe produz ona lei refere.

Maski antes votasaun hamosu tan idea balun hodi bele tau mos iha artigu balun hanesan husi Deputadu Joaquim dos Santos iha lista anexu 1 numeru 7 no mos Deputada Cidalizia dos Santos ne’ebe husu atu bele uza mos lian balun alende Portugues no Teum nu’udar lian offisial, hodi fasilita komprensa ba bainaka husi rai liur.

Deputada CNRT ne’e mos husu atu master seremonia mos tenki kumpri ba regra offisial nian tuir lei hodi respeita seremonia offisial ne’e hodi la uza lia fuan komiku.

Ho komentariu no koresaun hirak ne’e, Prezidenti Parlamentu Nasional, Maria Fernanda Lay ne’ebe diriji plenaria husu atu labele hamosu ona idea foun tamba lei ne’e hetan ona aprovasaun espesializada husi Komisaun B ne’ebe toma konta ba lei refere.

Ho aprovasaun projetu lei refere bele responde ona ba dezafius iha administrasaun protokolar, liu-liu assisténsias ba kargus iha servisus públikus kompostu husi Prezidénsia Repúblika, PN, Governu no Tribunais no mós estruturas tomak to’o iha administrasaun lokal.

Wainhira Xefe Estadu promulga ona projetu lei refere, Parlamentu Nasional husu MNEK atu sensibiliza Projetu lei Presedénsia no Protokolu Estadu ne’e ba funsionáriu sira hotu iha instituisaun estadu sira, nune’e bele iha kuiñesimentu kle’an atu bele realiza eventu importante sira.