Para iha Estrada Publiku, PN Husu Governu Regula Kareta Privadu Sira

DILI, www.news-viptv.com  – Deputadu Bankada CNRT, Ancleto Freitas husu ba governu atu regula no atua kareta privadu sira ne’ebe para iha estrada publiku maski iha sira nia uma oin.  

Deputadu Anacleto Freitas foti kestaun ne’e ba plenaria iha Parlamentu Nasional, Segunda (1/7/2024).

Deputadu ne’e esplika, persiza governu atu regula no atua, tamba estrada publiku, maski iha uma oin laos fatin hodi para kareta tuir ida-idak nian gostu hodi fo impaktu deretu ema seluk hetan impaktu susar hodi halo movimentu.

“Hau atu koalia konaba espasu publiku liu-liu kona-ba ita nia maun alin sira ne’ebe maka hola kareta, maibe sira la kria kondisoes ba iha kareta ne’e no fim kuandu to’o kalan kareta tama hotu bele trankado iha estrada dalaruma kareta seluk liu mos la diak pois ema koalia ba sira, sira hatan fali ami para iha estrada laos iha imi nia uma oin. Tamba ne’e mak sira (ne’ebe hetan impaktu) hato’o ba hau para bele fo hatene iha ne’e (PN), Vise Ministro asuntu Parlamenatar bele enkamina ba iha ministério kompetentes kontrola mos buat ida ne’e,” levanta deputadu CNRT ne’e.

Nune’e mos nia husu ba kompana sira ne’ebe kaer obra ba projetu estrada nian, liliu iha Kapital Dili atu rega obra ne’ebe halo nune’e labele fo impaktu la diak ba komunidade sira, espesialmente ne’ebe hela iha area projetu nian.

“Segundu, hau hakarak atu koalia konaba estrada ne’ebe maka agora Sidade Díli nian ne’ebe mak atu reabilitasaun ne’e karik bele fo autor ba iha kompania ne’e rega, se lae ita nia Komunidade sira hela besik ne’e han rai rahun,” dehan Anacleto Freitas.

Alende mos, husu Governo atu hare mos movimentu kareta bobo’ot sira ne’ebe tula sasan ba iha armazem kompana sira ne’ebe tuir deputadu ne’e, movimentu transporte refere bele estraga mos estrada tamba tula sasan liu kapasidade transporte.